Башҡортостанда колонияларҙан 2,5 мең кеше ваҡытынан алда иреккә сыҡҡан

ӨФӨ, 2017 йыл, 18 ғинуар. /«Башинформ» мәғлүмәт агентлығы, Ольга Мортазина/. Уҙған йылда Федераль яза башҡарыу хеҙмәтенең Башҡортостан буйынса идаралығы учреждениеларынан 2481 кеше ваҡытынан алда иреккә сыҡҡан. Уларҙың 1614-е — шартлы рәүештә. Тағы ла 867 енәйәтсенең язаһы холоҡ төҙәтеү эштәре йәки иректән сикләү менән алмаштырылған. Федераль яза башҡарыу хеҙмәтенең республика буйынса идаралығы матбуғат хеҙмәтендә хәбәр итеүҙәренсә, ваҡытынан алда иреккә сығыу тураһында мәсьәләне хәл итеү ваҡыты еткән хөкөм ителеүселәрҙең 53 проценты судҡа мөрәжәғәт итеү хоҡуғы менән файҙаланған. Зыян күргән кеше менән килешмәйенсә һәм килтерелгән барлыҡ зыянды ҡапламайынса, ваҡытынан алда иреккә сығыу мөмкин түгел.

Былтыр медицина күрһәткестәре буйынса 23, хөкөм ҡарарының үҙгәреүенә бәйле дүрт кеше иреккә сыҡҡан. 58 кеше Бөйөк Еңеүҙең 70 йыллығы уңайынан иғлан ителгән амнистияға эләккән.