Башҡортостан уҡыусыларҙың Бөтә Рәсәй олимпиадаһында лидерлыҡ позицияһын нығытты

2025/2026 уҡыу йылы йомғаҡтарына ярашлы Башҡортостан уҡыусыларҙың Бөтә Рәсәй олимпиадаһында ҡатнашыу һөҙөмтәләре буйынса йәнә алдынғылар иҫәбенә инде. Был хаҡта республика Башлығы хөкүмәттәге оператив кәңәшмәлә төбәктең мәғариф министры Илдар Мәүлитбирҙин хәбәр итте.

– Башҡортостан олимпиаданың йомғаҡлау этабы йомғаҡтары буйынса электән иң көслө ун төбәк иҫәбенә инә ине, ә хәҙер иң яҡшы бишәү араһында ышаныслы нығынды, – тип билдәләне Илдар Мәүлитбирҙин. – 2026 йылда республика уҡыусыларҙың Бөтә Рәсәй олимпиадаһының йомғаҡлау этабында ҡатнашыусылар һаны буйынса бишенсе урынды һаҡлап ҡалды.

Олимпиаданың һуңғы этабында төбәк йыйылма командаһы составына 193 уҡыусы ингән – был уҙған йылға ҡарағанда 40 кешегә күберәк. Республика уҡыусылары 78 наградаға лайыҡ булған – 13 еңеүсе һәм 65 призёр дипломы.

Ҡатнашыусылар химия, хоҡуҡ, информатика, физика, астрономия һәм йәмғиәтте өйрәнеү буйынса юғары һөҙөмтәләргә өлгәшкән. Йәш химиктар 14 дипломға лайыҡ булған, ә хоҡуҡ буйынса республика иҫәбендә – 11 диплом.

2018 йылдан Башҡортостанда уҡыусыларҙың Бөтә Рәсәй олимпиадаһы еңеүселәрен һәм призёрҙарын, шулай уҡ уларҙы әҙерләгән педагогтарҙы бүләкләү системаһы ғәмәлдә. Һәләтле уҡыусыларға һәм уҡытыусыларға ярҙам итеүҙә муниципалитеттар мөһим роль уйнай. Башҡортостандың күп кенә райондарында һәм ҡалаларында уҡыусыларҙың Бөтә Рәсәй олимпиадаһында ҡатнашыусыларҙы дәртләндереү саралары күрелә: аҡсалата премиялар, стипендиялар, махсус сертификаттар тапшырыла, уҡыусыларҙың һәм остаздарҙың ҡаҙаныштарын таныу программалары ғәмәлдә.

Оператив кәңәшмәлә республика Башлығы уҡыусыларҙың Бөтә Рәсәй олимпиадаһында информатика, география, хоҡуҡ, рус һәм инглиз телдәре буйынса уңыштарға өлгәшкән уҡыусыларға Башҡортостандың дәүләт наградаларын тапшырҙы. Бынан тыш, Радий Хәбиров Өфө фән һәм технологиялар университеты Хоҡуҡ институтының гражданлыҡ хоҡуғы кафедраһы доценты Олеся Ғимаҙрисламованы билдәләп үтте. Ул әҙерләгән уҡыусылар күп йылдар дауамында Бөтә Рәсәй кимәлендә уңыштарға өлгәшә.

– Башҡортостанда алған һөнәрем менән ғорурланам һәм олимпиадаға әҙерләгәндә уҡыусыларға ошо белемдәрҙе тапшырырға тырышам. Илебеҙҙең киләсәге уларҙың ҡулында булыуына ышанам, – тине Олеся Ғимаҙрисламова.

Төбәк Башлығы уҡыусыларҙы һәм уларҙың остаздарын лайыҡлы һөҙөмтәләре менән ҡотланы һәм яңы уңыштар теләне.

– Һеҙ әле бик йәш, әммә үҙегеҙ һәм республикабыҙ өсөн күпте эшләп өлгөрҙөгөҙ. Иң мөһиме – һеҙ үҙегеҙҙе белем менән байыттығыҙ, ә уңыштарығыҙ беҙҙең, талантлы балаларҙың үҫеше өсөн шарттар тыуҙырып, дөрөҫ йүнәлештә хәрәкәт итеүебеҙҙе раҫлаусы мөһим дәлил булып тора, – тине Радий Хәбиров. – Һеҙ тыуған Башҡортостаныбыҙҙы данлайһығыҙ, һәм беҙ һеҙгә бының өсөн ихлас рәхмәтлебеҙ.