Республикала ауыл мәктәптәре директорҙарына гранттар түләү тәртибе раҫланды

Башҡортостан хөкүмәте ауыл ерендә эшләгән дөйөм белем биреү учреждениелары етәкселәренә гранттар түләү тәртибен раҫланы. Документҡа премьер-министр Андрей Назаров ҡул ҡуйған.

Яңы башланғыс ауыл мәктәптәре директорҙарын һөнәри уңышҡа дәртләндереүгә һәм республиканың алыҫ райондарында белем биреү учреждениеһы етәксеһе һөнәренең абруйын күтәреүгә йүнәлтелгән. Аҡса йыл һайын республика бюджетынан махсус ойошторолған конкурста еңеүсе тип танылған белем биреү ойошмаларының иң яҡшы етәкселәренә бүленә.

Республиканың Мәғариф министрлығы ауыл ерендә мәғарифты үҫтереүҙә юғары ҡаҙаныштарға өлгәшкән иң яҡшы идара итеү кадрҙарын конкурс буйынса һайлап алғандан һуң гранттар биреү тураһында ҡарар ҡабул итергә тейеш. Конкурста еңеүселәргә бер тапҡыр бирелә торған аҡсалата ярҙам күрһәтелә.

Грант алыусылар бер нисә талапты үтәргә бурыслы, шул иҫәптән аҡса алғандан һуң мәктәптә кәмендә 10 йыл эшләргә кәрәк. Ошо шартты үтәмәгән осраҡта аҡсаны республика бюджетына кире ҡайтарыу талап ителә.

Гранттар түләү тәртибен үтәүҙе Башҡортостан премьер-министрының беренсе урынбаҫары Урал Килсенбаев контролдә тота.

Хәтерегеҙгә төшөрәбеҙ, 2025 йылдың 1 ғинуарынан Башҡортостанда йыл һайын ауыл ерендә эшләгән дөйөм белем биреү ойошмалары етәкселәре өсөн 50 грант булдырылды. Һәр гранттың суммаһы – 690 мең һум.

https://www.bashinform.ru/news/obrazovanie/2025-10-29/v-bashkirii-utverzhden-poryadok-vyplaty-grantov-direktoram-selskih-shkol-444537