Республика етәксеһе сығарылыш уҡыусыларына БДИ-ла яҡшы һөҙөмтәләр өсөн рәхмәт белдерҙе

Башҡортостан Башлығы Радий Хәбиров 2025 йылғы сығарылыш уҡыусыларына берҙәм дәүләт имтиханында яҡшы һөҙөмтәләр өсөн рәхмәт әйтте һәм артабанғы имтихандарҙа уңыштар теләне. Бөгөн хөкүмәттең оператив кәңәшмәһендә ул тәүге өс фәндән яҡынса мәғлүмәттәрҙе иғлан итте.

«Миндә БДИ буйынса тәүге мәғлүмәт бар: тарих, әҙәбиәт һәм химия фәндәренән һөҙөмтәләр килде. Беҙҙә 72 уҡыусы йөҙ балл йыйған. Афарин, ҡотлайым. Уҙған йылғы һөҙөмтәләрҙән күпкә юғарыраҡ. Белем биреү сифатының артыуын күрәбеҙ. Балаларға уңыштар теләйбеҙ», — тине Радий Хәбиров.

Башинформ хәбәр иткәнсә, 2775 кеше химиянан һынау тотҡан, 68 уҡыусы 100 балл туплаған, ә былтыр ошо предметтан 52 уҡыусы йөҙ балға яҙған. Ә 730 уҡыусы 81 һәм унан юғарыраҡ балл алған.

Тарихтан 1538 кеше БДИ яҙған. Өс уҡыусыныҡы – 100 балл. 251 кеше 81 һәм унан юғарыраҡ балл йыйған.

Әҙәбиәт буйынса 536 кеше имтихан тапшырған. Береһе 100 балл туплаған, 32 уҡыусының иһә 81 балдан күберәк.

https://www.bashinform.ru/news/obrazovanie/2025-06-09/radiy-habirov-poblagodaril-vypusknikov-bashkirii-za-otlichnye-rezultaty-ege-4270333