Рәсәйҙә башланғыс класс уҡыусылары өсөн өйгә эш нормалары раҫланды

2025 йылдың 1 сентябренән 1-4-се класс уҡыусылары өсөн өйгә эш ваҡыты раҫланған нормаларнан артмаҫҡа тейеш. Был хаҡта Рәсәйҙең Мәғариф министрлығы документына һылтанма менән РИА Новости хәбәр итә.

Документтан күренеүенсә, беренсе класта уҡыусылар өйгә эш өсөн 1 сәғәт, икенсе һәм өсөнсө кластарҙа — 1,5 сәғәт, ә дүртенсе класта 2 сәғәт ваҡыт сарыф итергә тейеш.

Бынан тыш, мәктәптәр һәр кластың барлыҡ фәндәр буйынса өйгә эштең күләмен контролдә тоторға тейеш. Шул уҡ ваҡытта өйгә эште ағымдағы дәрестә бирергә кәңәш ителә, уҡытыусы электрон журналға мәғлүмәтте уҡыу көнө тамаланғансы уҡ яҙып ҡуйырға бурыслы. 

Оҙайлы әҙерлек талап иткән эште үтәү өсөн уҡыусыларға әҙерләнергә етерлек ваҡыт бирергә кәрәк.

Хәбәр иткәнебеҙсә, 1 сентябрҙән Рәсәйҙә мәктәп программаларын төп дәүләт имтиханы һәм берҙәм дәүләт имтиханы менән синхронлаштыралар.

https://www.bashinform.ru/news/obrazovanie/2025-04-15/v-rossii-utverdili-normy-domashnego-zadaniya-dlya-uchenikov-nachalnyh-klassov-4198587