Баш ҡалала АЗС-тарҙа сират 700 машинаға тиклем кәмегән

Өфөлә иртәнге сәғәт 10-ға 31 эре АЗС-та 700-гә яҡын автомобиль сиратта тора ине, тип хәбәр итте БР сәнәғәт министры урынбаҫары Эдуард Мостафин Республикаға идара итеү үҙәгендә үткән брифингта. Заправкаларҙа хәҙер тынысыраҡ: йәкшәмбелә 1,35 мең машина булһа, дүшәмбелә иһә 972. Бер генә заправка эшләгән райондарҙа оҙон сират һуҙыла, Дим биҫтәһе кеүек халыҡ күп йәшәгән райондарҙа ла шундай уҡ хәл күҙәтелә. Бында көндөҙгө сәғәт 12-гә яғыулыҡ бөткән, килтереүҙәрен көтәләр.

Йәкшәмбе Асҡын районында 250-гә яҡын кеше яғыулыҡ көтә ине. Район башлығы Динис Йосопов хәбәр итеүенсә, һыу баҫҡан биләмәләрҙә йәшәүселәргә бензинды канистрға ҡойоп алырға рөхсәт ителгән. Намыҫһыҙ водителдәр ҡамасаулыҡ тыуҙырмаһын өсөн АЗС-та һыу баҫҡан ауылдар халҡы исемлеге төҙөлгән.

Саҡмағоштар хәбәр итеүенсә, уларҙың «Башнефть» АЗС-ы 30 литр урынына 20 литр ғына бензин һата башлаған. Властар был хәлде асыҡларға вәғәҙә бирҙе.

Хәйбулла районында ике көндән ашыу яғыулыҡ менән тәьмин итеүҙә өҙөклөктәр бар, ә сибайҙар «Башнефттең» биш АЗС-ында бензин булмауы хаҡында хәбәр итте. Эдуард Мостафин әйтеүенсә, был биләмәләргә бензовоздар ебәрелә, ә өҙөклөктәр араның алыҫ булыуына бәйле.

Властар билдәләүенсә, яғыулыҡ өсөн ҡушымта аша түләгән, ләкин заправкала бензин булмаған осраҡта аҡсаны кире ҡайтарыу менән проблемалар юҡ.