Быйыл республиканың 3 муниципалитетында подъездарҙы ремонтлау планлаштырыла

2025 йылда Башҡортостандың 3 муниципалитетында – Өфө ҡалаһында, Стәрлетамаҡ һәм Стәрлебаш райондарында подъездарҙы ремонтлау планлаштырыла. Финанслау күләме 21 миллион һум тәшкил итер тип көтөлә. Был хаҡта «Башинформ»ға республиканың Торлаҡ-коммуналь хужалыҡ министрлығынан хәбәр иттеләр.

Программа ғәмәлгә ашырылған ваҡытта – 2019-2024 йылдарҙа 2783 йортта 8290 подъезд яңыртылған, сығымдарҙың дөйөм суммаһы 3,5 миллиард һумдан ашып киткән.

«Таҙа, яҡты – ҡарауы күңелле, – тине Радий Хәбиров башҡарылған эштәрҙе ҡарап сыҡҡандан һуң. – Программа буйынса иҫке тәҙрәләрҙе яңыһына, пластикка алмаштырабыҙ, почта йәшниктәре, тамбур ишеге ҡуябыҙ, беренсе ҡатта плитка түшәйбеҙ. Стеналарҙың төҫөн йортта йәшәүселәр үҙҙәре һайлай. Улар эштәрҙе ҡабул итеүҙә лә ҡатнаша – подрядсы етешһеҙлектәрҙе бөтөргәс кенә актҡа ҡул ҡуйыла».

Хәбәр иткәнебеҙсә, Башҡортостанда күп фатирлы йорттарҙың подъездарын ремонтлау тамамланды.

https://www.bashinform.ru/news/economy/2025-01-08/v-bashkirii-v-2025-godu-remont-pod-ezdov-planiruetsya-v-3-munitsipalitetah-4077518