Радий Хәбиров Башҡортостанда етештерелгән сифатлы продукция хаҡында һөйләне

Башҡортостанда йәшәүселәр «Башҡортостан продукты» тип яҙылған һәм республика флагы төҫтәрендәге логотип төшөрөлгән тауарҙарҙы яҡшы белә. Был продукттың урында етештерелеүе, сифат һәм хәүефһеҙлек нормаларына тап килеүе хаҡында һөйләй. Был хаҡта Башҡортостан Башлығы Радий Хәбиров социаль селтәрҙәге сәхифәһендә яҙған.

Проекттың дипломанттары йылдан-йыл арта, тип хәбәр итте ул. Әйтәйек, биш йылда улар 70% артҡан, ошо осорҙа бындай маркировкалы тауарҙар һаны 30 меңгә еткән. Һуңғы ярты йылда проектта ҡатнашыуға 62 дипломант ҡушылған. Хәҙер проектта – 823 ҡатнашыусы, уларҙың 665-е – аҙыҡ-түлек һәм 158-е – башҡа төрлө тауарҙар етештереүселәр.

Башҡортостанда етештерелгән сифатлы продукция республиканан ситкә сығарыла. «Башҡортостан продукты»нда ҡатнашыусы 326 кеше продукцияны Рәсәй субъекттарына оҙата, 35 дипломант продукцияһын сит илдәәргә экспортлай.

«Проектта ҡатнашыу етештереүселәргә төбәк һәм федераль сауҙа селтәрҙәренә инергә мөмкинлек бирә. Ысынында иһә республикабыҙҙа һәм унан ситтә ихтыяж ҙур булған берҙәм көслө бренд булдыра алдыҡ», - тип билдәләне Радий Хәбиров.

«Башҡортостан продукты» сифат билдәһен бушлай алырға мөмкин, тип хәтергә төшөрҙө Башҡортостан Башлығы. Тулыраҡ мәғлүмәт – проекттың сайтында.

https://www.bashinform.ru/news/economy/2024-11-08/radiy-habirov-rasskazal-o-produktsii-vysokogo-kachestva-proizvodimoy-v-bashkirii-4000252