Башҡортостан үҙенең фәнни-технологик үҫеш программаһын тормошҡа ашыра

Вазифаны үтәй башлауға арналған тантанала Башҡортостан Башлығы Радий Хәбиров республикала фәнни-технологик үҫеш программаһын ғәмәлгә ашыра башлауҙары хаҡында һөйләне. Ул пилот төбәктәр араһында иң яҡшыларҙың береһе тип танылды. «Башинформ» хәбәр иткәнсә, Башҡортостан 2022 йыл йомғаҡтары буйынса ил президенты ҡушыуы буйынса беренсе тапҡыр төҙөлгән лидер-төбәктәр рейтингында тәүге бишәү иҫәбенә инде. Хәтерегеҙгә төшөрәбеҙ, Владимир Путин технологик лидерлыҡты ил үҫешенең милли маҡсаттарының береһе тип билдәләне.

«Бизнес, юғары уҡыу йорттары һәм ғилми ойошмалар менән хеҙмәттәшлек иткәндә беҙ тулайым төбәк продуктында тикшереүҙәргә һәм асыштарға эске сығымдарҙың өлөшөн ике процентҡа тиклем арттырырбыҙ. Әле был күрһәткес ярты процент тәшкил итә. Үҙебеҙ әҙерләгән юғары технологиялы тауарҙарҙы һәм хеҙмәттәрҙе индерә башлайбыҙ. Фотоника һәм микроэлектроника, пилотһыҙ авиация системалары, химия, генетика, медицина, IT-технологиялар кеүек өҫтөнлөклө йүнәлештәр буйынса 300-ҙән ашыу яңы алдынғы етештереү технологияһын әҙерләп, производствоға тапшырырбыҙ», - тип билдәләне Радий Хәбиров.

Радий Хәбировтың Башҡортостан хөкүмәте алдынаҡуйған бурыстар тураһында тулыраҡ «Башинформ» материалында уҡығыҙ.

https://www.bashinform.ru/news/economy/2024-09-12/bashkiriya-pristupaet-sobstvennuyu-programmu-nauchno-tehnologicheskogo-razvitiya-3926504