Башҡортостанда йылҡысылыҡты үҫтереүгә 200 миллион һум аҡса бүленгән

Һуңғы өс йылда Башҡортостанда йылҡысылыҡты үҫтереүгә 200 миллион һум дәүләт ярҙамы бүленгән. Был хаҡта Баймаҡ районында үткән «Башҡорт аты» халыҡ-ара фестивалендә Хөкүмәт Премьер-министры урынбаҫары – Башҡортостандың ауыл хужалығы министры Илшат Фәзрахманов белдерҙе.

Иҫегеҙгә төшөрәбеҙ, Башҡортостан Башлығы Радий Хәбировтың башланғысы менән 2022 йылдан «Башҡорт аты» халыҡ-ара фестивале ойошторола.

– Бөгөн йылҡы малы һаны (128 мең баш) буйынса республикабыҙ илдә икенсе урынды биләй, ҡымыҙ етештереү буйынса ла алдынғы урында тора. Һәм был тенденция 15 йыл дауамында һаҡлана, — тине Илшат Фәзрахманов.

Ул хәҙер ауыл хужалығы өсөн ҡаралған бөтә ярҙам саралары ла башҡорт йылҡысылары өсөн асыҡ булыуын билдәләне. Улар араһында льготалы кредиттар, техникаға, игенгә, һөткә субсидиялар, гранттар бар. Дөйөм алғанда, һуңғы өс йылда төбәктә йылҡысылыҡты менән шөғөлләнгән эшҡыуарҙарға 200 миллион һумдан ашыу дәүләт ярҙамы бүленгән.

Өс йылда грант ярҙамы күрһәтеү өлкәһендә генә бүленгән аҡсаның дөйөм күләме 131 миллион һумдан ашты, тип өҫтәнеләр Башҡортостан Ауыл хужалығы министрлығының матбуғат хеҙмәтендә.

https://www.bashinform.ru/news/economy/2024-08-16/na-razvitie-konevodstva-v-bashkirii-vydelili-200-mln-rubley-gospodderzhki-3888322

Автор: Галина Бахшиева