Республикала «Алға» махсус иҡтисади зонаһын киңәйтеү йүнәлештәре билдәләнде

Әлеге ваҡытта Башҡортостан Рәсәйҙең Иҡтисади үҫеш министрлығына «Алға» махсус иҡтисади зонаһы майҙанын арттырыу өсөн ғариза әҙерләй. Атап әйткәндә, Өфө районындағы 5-се майҙансыҡты киңәйтеү тураһында һүҙ бара, ошо маҡсатҡа 4 төп инвестиция проекты һайлап алынған. Ике компания проекттарҙың финанс моделдәрен һәм паспорттарын тәҡдим иткән. Был хаҡта хөкүмәттең оператив кәңәшмәһендә Башҡортостан хөкүмәте премьер-министры урынбаҫары - сәнәғәт, энергетика һәм инновациялар министры Александр Шельдяев хәбәр итте.

Махсус иҡтисади зонаны киңәйтеүҙең тағы ике потенциаль йүнәлеше буйынса эштәр бара, тип билдәләне ул. Улар - Ағиҙел һәм Салауат ҡалалары биләмәһендәге майҙансыҡтар. Бынан алдараҡ «Башинформ» Башҡортостан Башлығы Радий Хәбировтың Ағиҙелде «Алға» махсус иҡтисади зонаһына индереү өсөн инвесторҙар табырға ҡушыуы тураһында хәбәр иткәйне. Бөгөнгә дөйөм суммаһы яҡынса 3,6 миллиард һумлыҡ 8 инвестиция проектынан пул формалаштырылған. Хәҙер ошо проекттарҙың параметрҙарын аныҡлау һәм яңы инвесторҙар йәлеп итеү бара.

Александр Шельдяев әйтеүенсә, 2025-2026 йылдарға «Алға» зонаһын үҫтереүҙең төп бурыстары: Салауат һәм Ағиҙел ҡалаларындағы ер участкалары иҫәбенә «Алға» махсус иҡтисади зонаһының майҙанын арттырыу, ғәмәлдәге майҙансыҡтарҙың планлаштырылған инженер, транспорт һәм энергетика инфраструктураһы объекттарын файҙаланыуға тапшырыу, шулай уҡ уларҙы 100%  резиденттар менән тултырыу.

https://www.bashinform.ru/news/economy/2024-05-13/v-bashkirii-oboznachili-napravleniya-rasshireniya-oez-alga-3763182