Башҡортостанды донъя конгресс майҙансығы рәүешендә артабан үҫтереү өсөн заманса һәм алдынғы инфраструктура булдырыу мөһим. Уның үҙәге — 60 мең квадрат метрҙан ашыу майҙанды биләгән Халыҡ-ара экспоүҙәк проекты.
— Әлегә ул «Конгресс Тау» тип атала. Концептуаль яҡтан илдә иң яҡшыһы булмаҡсы. Бының өсөн майҙансыҡ билдәләнгән, — тип белдерҙе премьер-министр Андрей Назаров Дәүләт Йыйылышында республика хөкүмәтенең йыллыҡ отчеты менән сығыш яһағанда.
Премьер-министр һүҙҙәренсә, конгресс-күргәҙмә эшмәкәрлеген үҫтереү йәһәтенән тырышып эшләү һөҙөмтәһендә Башҡортостан ваҡиғалар потенциалын бойомға ашырыу буйынса иң яҡшы өс төбәк иҫәбенә инде.
— Былтыр беҙҙә Рәсәй һәм Белоруссия төбәктәренең X юбилей форумы үтте. Ил етәкселеге уны ойоштороу эшенә юғары баһа бирҙе. Көҙөн Өфөлә Рәсәй менән Ҡаҙағстандың ХХ төбәк-ара хеҙмәттәшлек форумы ойошторола, — тип билдәләне Андрей Назаров.