Радий Хәбиров Туймазыла «Велес» мебель фабрикаһы продукцияһын баһаланы

Башҡортостан Башлығы Радий Хәбировтың Туймазы районына эш сәфәре «Велес» мебель фабрикаһынан башланды. Был – арзан һәм сифатлы корпуслы мебель үҫтереүгә йүнәлтелгән заманса  компания. Фабрика директоры Руслан Сәләхов һүҙҙәренсә, предприятие үҙ көсө менән йорт, шулай уҡ офис өсөн уңайлы, оҙайлы ваҡытҡа иҫәпләнгән йыһаздар проектлай һәм етештерә. Йоҡо гарнитурҙары, ҡунаҡ бүлмәһе, алғы бүлмә, балалар өсөн йыһаздар, шкафтар, өҫтәлдәр, тумбалар, карауаттар һәм башҡалар. Заводтың продукцияһы Рәсәйҙең 13 төбәгенә һәм Ҡаҙағстанға оҙатыла.

2001 йылда ойошторолған компания 22 йыл эсендә етештереү күләмен арттырып, федераль баҙарға сыҡты. «Велес» мебель фабрикаһы Волга буйы федераль округының мебель кластерында ҡатнаша.

Быйыл инвестиция проекттары сиктәрендә фабрикала 35 миллион һумға склад төҙөлә һәм 72 миллион һумға яңы ҡорамалдар һатып алына башланы.

Радий Хәбиров продукция өлгөләре ҡуйылған фабриканың мебель салонын да ҡараны. Фабрикала сифатлы, стилле һәм арзан йыһаздар етештерелә, тип билдәләне ул.

«Был предприятиелар аяғында ныҡлы баҫып тора, әүҙем үҫешә, мебель баҙарын яулай. Рәсәйҙә беренсе мебель кластерын булдырыуыбыҙ булышлыҡ итәлер, моғайын. Мин һәр саҡ ғәжәпләнәм. Корпуслы, йоҡо бүлмәһе, офис өсөн йыһаздар эшләгән эшҡыуарҙарҙың барыһы ла – йәштәр. Мебель бик юғары сифатлы. Улар производствоны даими арттыра һәм яңырта. Уларҙың эш урынында эшсе көстәр күп талап ителмәй. Хәҙер эшсе көсөнөң проблема икәнен беләһегеҙ. Был йәһәттән улар ниндәйҙәр мәғәнәлә ота ғына», - тип билдәләне Радий Хәбиров.

https://www.bashinform.ru/news/economy/2023-12-22/radiy-habirov-otsenil-v-tuymazah-produktsiyu-fabriki-mebeli-veles-3577840