Башҡортостан һәм Ҡытай Халыҡ Республикаһының Хубэй провинцияһы үҙ-ара бәйләнештәрҙе нығытыу яҡлы

Бөгөн Ҡытайҙың Наньчан ҡалаһында үткән Волга буйы федераль округы һәм Янцзы йылғаһының үрге, урта ағымы төбәктәренең Төбәк-ара хеҙмәттәшлек буйынса советы ултырышы Хубэй провинцияһы менән мөнәсәбәттәрҙе нығытырға мөмкинлек бирергә тейеш. Башҡортостан хөкүмәте премьер-министры Андрей Назаров Хубэй провинцияһы губернаторы урынбаҫары Чэнь Пинь ханым менән осрашыуҙа ошо турала белдерҙе.

«Башҡортостан – Рәсәйҙең сәнәғәт яғынан үҫешкән төбәктәренең береһе. Беҙҙә нефть ятҡылыҡтары күп. Шулай уҡ тимер, баҡыр, цинк һәм башҡа файҙалы ҡаҙылмалар ятҡылыҡтары бар. Берлектә эш алып барырға мөмкин», - тип ышана Андрей Назаров.

Хубэй провинцияһы вице-губернаторы ла шундай ҡарашта. Чэнь Пинь ханым һүҙҙәренсә, ул Башҡортостан тураһында хәбәрҙар.

«Хеҙмәттәшлектә ҙур өмөттәр бағлайбыҙ. Нефть химияһы тармағында, аҙыҡ-түлек өлкәһендә һәм агросәнәғәт өлкәһендә. Минеңсә, бөгөнгө осрашыу артабанғы хеҙмәттәшлеккә яңы этәргес бирер тип ышанабыҙ», - тине Ҡытайҙың Хубэй провинцияһы вице-губернаторы һәм киләһе йылдың яҙында Башҡортостанға килергә вәғәҙә бирҙе.

https://www.bashinform.ru/news/economy/2023-11-08/bashkiriya-i-provintsiya-hubey-knr-namereny-uvelichit-vzaimnye-kontakty-v-kratnom-razmere-3511200