Башҡортостанда Пилотһыҙ авиация системаларын үҫтереү дирекцияһы булдырылды

Башҡортостан Башлығы Радий Хәбировтың указы менән республикала Пилотһыҙ авиация системалары тармағын үҫтереү дирекцияһы булдырылды. Документ Башҡортостан Республикаһының рәсми хоҡуҡи мәғлүмәт интернет-порталында баҫылған.

Ҡарар пилотһыҙ авиация системалары тармағын үҫтереү, шул иҫәптән граждандар һәм хәрбиҙәр өсөн пилотһыҙ осоу аппараттары етештереү, тармаҡтың ғилми-технологик, кадрҙар потенциалын үҫтереү өсөн ҡабул ителде. Указ менән Дирекция составы раҫланды, унда  Башҡортостан Хөкүмәте ағзалары, предприятиелар, коммерцияға ҡарамаған ойошмалар етәкселәре, төп юғары уҡыу йорттары ректорҙары, колледждар директорҙары бар. Дирекция рәйесе итеп республиканың сәнәғәт, энергетика һәм инновациялар министры Александр Шельдяев тәғәйенләнде.

Дирекция 2035 йылға тиклем Башҡортостанда пилотһыҙ авиация үҫеше стратегияһын, пилотһыҙ авиация системалары тармағын үҫтереү буйынса саралар планын әҙерләргә тейеш.

https://www.bashinform.ru/news/economy/2023-09-06/v-bashkirii-sozdana-direktsiya-po-razvitiyu-bespilotnyh-aviatsionnyh-sistem-3421300