Башҡортостандың 52 районында мал аҙығы культураларын сабыуға төшкәндәр

Башҡортостанда әлеге көндә 54 райондың 52-һендә бесән һәм сенаж әҙерләү эштәре бара. 26 июнгә ҡарата мәғлүмәттәр буйынса, төбәктә 111 мең гектар майҙанда үлән сабылған, тип хәбәр иттеләр Башҡортостандың Ауыл хужалығы министрлығында. Бөтәһе 29 мең тонна бесән һәм 255 мең тоннаға яҡын сенаж әҙерләнгән.

Саҡмағош хужалыҡтары алдынғылыҡты бирмәй, улар 6,6 мең гектарҙа  үләнде сабып алып, 23,6 мең тонна сенаж әҙерләп ҡуйған. Ауырғазы районында ла шундай уҡ күләмдә сенаж һалынған – 23,5 мең тонна. Артабан Стәрлетамаҡ районы килә – 20 мең тонна.

Бесән әҙерләү буйынса алдынғылар иҫәбендә – Ейәнсура (3,5 мең тонна) һәм Көйөргәҙе (2,1 мең тонна) райондары.

https://www.bashinform.ru/news/economy/2023-06-27/v-bashkirii-kosovitsa-kormovyh-kultur-idyot-v-52-rayonah-3317212