Башҡортостан аграрийҙарына льготалы кредиттарға өҫтәмә рәүештә 86 миллион һум бүленде

Башҡортостан аграрийҙарына 2023 йылда агросәнәғәт комплексын льготалы кредитлау өсөн өҫтәп 86 миллион һум аҡса бүленде. Рәсәй Ауыл хужалығы министрлығының ошо ҡарары хаҡында республика хөкүмәтенең матбуғат хеҙмәтенән хәбәр иттеләр.

Башланғыс ауыл хужалығы секторына йылына 5% тиклем ставка менән тағы 2,4 миллиард һум кредит йәлеп итергә мөмкинлек бирергә тейеш.

«Льготалы кредиттар миҙгелле баҫыу эштәрен башҡарыу өсөн төп аҡса сығанағы булып ҡала. Бөгөн федераль аграр ведомство Башҡортостан аграрийҙарының 6,7 миллиард һумлыҡ кредитҡа 237 ғаризаһын хупланы, заемсыларға 5,2 миллиард һум бирелде. Льготалы кредитлау барышында Башҡортостандың агросәнәғәт комплексы предприятиеларына дөйөм суммаһы 3,4 миллиард һумлыҡ 115 ғариза хупланды», — тине Башҡортостан хөкүмәте премьер-министры урынбаҫары — ауыл хужалығы министры Илшат Фәзрахманов.

Республикала агросәнәғәт комплексын льготалы кредитлау буйынса аҡсаның дөйөм күләме 480,6 миллион һум тәшкил иткән — түбәнәйтелгән ставка буйынса 9 миллиард һумлыҡ кредит.

Бынан алдараҡ «Башинформ» Башҡортостандың агросәнәғәт комплексын һанлы үҙгәртеү буйынса илдә икенсе урын алыуын хәбәр иткәйне.

https://www.bashinform.ru/news/economy/2023-05-23/agrariyam-bashkirii-dopolnitelno-vydelili-86-mln-rubley-na-lgotnye-kredity-3269026