Республикала бейә һөтөнән косметика етештерә башлайҙар. Рәсәйҙең Иҡтисади үҫеш министрлығы «Благзавод» яуаплылығы сикләнгән йәмғиәтен «Благовещен» йылдам үҫеш биләмәһе резиденттары реестрына индерҙе. Компания – йылдам социаль-иҡтисади үҫеш биләмәһенең 35-се ағзаһы.
«Башинформ» агентлығына Благовещен районы хакимиәте башлығы Олег Головтан билдәле булыуынса, проектты ғәмәлгә ашырыуға яҡынса 3 миллион һум һалына. Аҡса етештереү бинаһы һәм технологик ҡорамалдар һатып алыуға йүнәлтелә. Производствоны асыу ун яңы эш урыны булдырырға мөмкинлек бирә. Компания хужаларының йылына 6500 тауар етештереп сығарыу планы бар. Уларҙы сауҙа селтәрҙәрендә, шулай уҡ күргәҙмәләрҙә һәм йәрминкәләрҙә һатырға ниәтләй.
Продукцияла бейә һөтөнән тыш, тәбиғи үҫемлек һәм мал компоненттары файҙаланыла.