Республиканың 28 предприятиеһы вәкилдәре бизнес-миссия менән Иранға барырға йыйына

Республиканың нефть-газ, химия һәм ауыл хужалығы сәнәғәте, машиналар төҙөү өлкәһендә эшләгән 28 предприятиеһы 2022 йылдың октябрендә Башҡортостан делегацияһының рәсми сәфәре барышында планлаштырылған бизнес-миссияла ҡатнашыу өсөн Иранға ғариза бирҙе. Башҡортостандың тағы 45 ойошмаһы бизнес-миссияла ҡатнашыу мөмкинлеген ҡарай. Ошо хаҡта республика хөкүмәтенең матбуғат хеҙмәте хәбәр итә.

Иран менән кооперация Башҡортостан өсөн бик мөһим. 2021 йыл йомғаҡтары буйынса үҙ-ара тауар әйләнеше 121,1 миллион доллар тәшкил иткән. 2022 йылдың ғинуар-июнендә Башҡортостандан Иранға экспорт күләме 2021 йылдың ошо уҡ осоро менән сағыштырғанда 53,5%, импорт күләме 46 тапҡырға артҡан. Экспорттың күпселек өлөшө, 90% ашыуы, аҙыҡ-түлек тауарҙарына һәм сеймалға тура килә.

Рәсәйҙең сауҙа вәкиллегендә Башҡортостан Республикаһы Тышҡы иҡтисади бәйләнештәр һәм конгресс эшмәкәрлеге министрлығынан командировкаға ебәрелгән хеҙмәткәр эшләй башлай. Иран партнерҙары яғынан да ике яҡлы сауҙа-иҡтисади хеҙмәттәшлекте үҫтереүгә ҡыҙыҡһыныуҙың ҡырҡа артыуы күҙәтелә. Мартта Иранда Рәсәй менән сауҙа-иҡтисади хеҙмәттәшлекте киңәйтеү мәсьәләләре буйынса оператив штаб ойошторолған.

https://www.bashinform.ru/news/economy/2022-09-20/predstaviteli-28-predpriyatiy-bashkirii-otpravyatsya-s-biznes-missiey-v-iran-2956750