Республика ҡалаларында һәм ауылдарында йорттар төҙөү хаҡы билдәле булды

Статистиктар 2022 йылдың ғинуар-август айҙарында Башҡортостанда күп фатирлы йорттар төҙөү хаҡын иғлан итте.

Башстат мәғлүмәттәре буйынса, республиканың күп фатирлы йорттарында торлаҡтың бер квадрат метрын төҙөү хаҡы уртаса 59 286 һум тәшкил иткән. Шул уҡ ваҡытта ауыл ерендә бер «квадрат» торлаҡтың хаҡы ҡалаға (60 054 һум) ҡарағанда күпкә осһоҙораҡ — 36 802 һум.

Быйыл һигеҙ айҙа Башҡортостанда төҙөүселәр — юридик берәмектәр һәм шәхси төҙөүселәр 1,937 миллион квадрат метр торлаҡты файҙаланыуға тапшырған. Был иһә 2021 йылдың ғинуар-авгусына ҡарағанда 9 процентҡа күберәк. Сафҡа индерелгән торлаҡтың 33,1 проценты — төҙөүселәр —юридик шәхестәргә , 66,9 проценты шәхси төҙөүселәргә тура килә.

«Башинформ» агентлығы хәбәр иткәнсә, быйыл 2,343 миллион квадрат метр торлаҡты файҙаланыуға тапшырыу күҙаллана. Йыл аҙағына Башҡортостанда 110,9 мең ғаилә торлаҡ шарттарын яҡшыртырға тейеш.

https://www.bashinform.ru/news/economy/2022-09-20/nazvana-stoimost-stroitelstva-domov-v-gorodah-i-selah-bashkirii-2956684