Республикала яңы йыл табыны өсөн аҙыҡ-түлек хаҡы 6743 һум тәшкил итте — Башстат

Башҡортостанда яңы йыл табыны өсөн аҙыҡ-түлек хаҡы 6 743 һум тәшкил итте. Башстат мәғлүмәттәренә ярашлы, уҙған йылдағы хаҡтар менән сағыштырғанда, был 13% тиерлек күберәк.

Башҡортостанда бер йылда «Оливье» индексы ла артып, 348,9 һум тәшкил иткән, былтырғы күрһәткестәрҙән 11% юғары. Ә бына рәсәйҙәрҙең яратҡан «Тун аҫтындағы сельдь» салаты быйыл 2020 йылдың декабренә ҡарағанда күпкә ҡиммәтерәккә төшә. Уны әҙерләү өсөн кәрәкле ризыҡтарға хаҡтар уртаса 26,5% артҡан.

Бигерәк тә балыҡтан эшләнгән тоҙло һәм ыҫланған деликатестар, шулай уҡ һөмбаш ыуылдырығы, торт, шампан, картуф, ҡыяр, ҡош ите ҡыйбатланған. Әфлисунға, лимонға, һутҡа һәм коньякка хаҡтар төшкән.