Республикала урмандарҙы эшкәрткәндән һуң умарталыҡтары зыян күргән умартасыларға компенсация түләнә

2021 йылдың яҙында урмандарҙы парһыҙ ебәк күбәләгенә ҡаршы эшкәрткәндә хужалыҡтары зыян күргән умартасыларға компенсация түләнә.

Субсидия алыусыларҙың исемлеге Башҡортостандың Ауыл хужалығы министрлығы сайтында баҫылған.

Бөтәһе 17 миллион һумға яҡын аҡса бүленә. Аҡса 61 эшҡыуарға бирелә, субсидиялар күләме 1,3 миллион һумдан 25 мең һумға тиклем тәшкил итә.

Умартасылар юғалтыуҙарҙы ҡаплау өсөн 2021 йылдың 24 ноябренән 22 декабренә тиклем ғариза бирә алды.

Хәтерегеҙгә төшөрәбеҙ, Башҡортостанда урмандарҙы парһыҙ ебәк күбәләге ҡарышлауыҡтарына ҡаршы эшкәрткәндән һуң биш райондың умартасылары зыян күрҙе.

26-28 майҙа бал ҡорттарының ҡырылыуы тураһында тәүге хәбәрҙәр килә башланы. Мәҡсүт һәм Мораҡ ауылдары умартасылары беренселәрҙән булып саң ҡаға башланы. Йылайыр һәм Ейәнсура райондарында ла бал ҡорттарының ҡырылыуы теркәлде.