Башҡортостан һәм Өфө яңылыҡтары
78.94
+0.3
89.15
+0.22
90.89
+0.93
-15 °C
Ҡар
Бөтә яңылыҡтар
Иҡтисад
17 Декабрь 2021, 15:54

Өфөлә Бәләкәй һәм урта эшҡыуарлыҡ корпорацияһынан илдә тәүге «Фермер утрауы» асылды

Бөгөн Өфөлә Бәләкәй һәм урта эшҡыуарлыҡ корпорацияһынан Рәсәйҙә тәүге «Фермер утрауы» асылды. «Фермер утрауы» – «shop-in-shop» форматындағы сауҙа нөктәһе, уның кәштәләрендә урындағы етештереүселәрҙең, беҙҙең осраҡта республика фермерҙарының һәм ауыл хужалығы кооперативтарының продукцияһы бар.

Башҡортостан ошондай сауҙа нөктәләре селтәрен булдырыу буйынса федераль проектты тормошҡа ашырыу өсөн пилот төбәге булып тора. Был аңлашыла ла, республикала 7 меңдән ашыу фермер хужалығы иҫәпләнә. Хужалыҡ итеүҙең кесе формалары төбәктә ауыл хужалығы продукцияһын етештереү күләмен арттырыуҙа төп роль уйнай. Шуныһы мөһим: дүрт йыл рәттән Башҡортостан илдә ауыл хужалығы ҡулланыусылар кооперативтары һаны буйынса алдынғы урынды биләй. Улар республикала 370-тән ашыу, ауыл хужалығы ҡулланыусылар кооперативының төп маҡсаты кооператив ағзаларының хужалыҡтарында етештерелгән ауыл хужалығы продукцияһын бергәләп эшкәртеүҙе ойоштороуға ҡайтып ҡала.

Тәүге «Фермер утрауы» «Магнит» супермаркетында асылды. Адресы: Өфө ҡалаһы, Б. Баландин бульвары, 9-сы йорт. Ассортиментта экологик яҡтан таҙа һөт ризыҡтары, шул иҫәптән сырҙар, ит изделиелары, ярымфабрикаттар һәм бакалея», – тип белдерҙеләр Башҡортостан Ауыл хужалығы министрлығының матбуғат хеҙмәтендә.

«Беҙҙең фермерҙар һәм ауыл хужалығы кооперативтары күп төрлө үҙенсәлекле продукция етештерә, – тине Башҡортостан хөкүмәте премьер-министры урынбаҫары – ауыл хужалығы министры Илшат Фәзрахманов «Фермер утрауы»н асыу тантанаһында. – Улар – ҡымыҙ, ҡорот, ҡаҙы һәм башҡа һөт, ит, емеш-еләк деликатестары. Был ризыҡтар башлыса берәмләп һатыла торған тауар. Беҙ уларҙы йәрминкәләрҙә, күргәҙмәләрҙә, махсус сауҙа нөктәләрендә һатабыҙ, ләкин әлегә былар ғына етмәй, ҙур магазиндарҙа Бәләкәй һәм урта эшҡыуарлыҡ корпорацияһы ойошторған фермер нөктәләренең яңы форматын дәртләнеп ҡаршы алабыҙ».

«Бәләкәй һәм урта эшҡыуарлыҡты үҫтереү корпорацияһы ойоштороусы булып ҡына сығыш яһамай: беҙ «Фермер утрауы» өсөн майҙансыҡ табырға ярҙам итәбеҙ, эшҡыуарҙарыбыҙға отошло булһын өсөн магазиндар менән ҡуртым шарттары тураһында килешәбеҙ, магазин төҙөүгә сығымдарҙы кәметеү өсөн ҡорамалдар эҙләүҙе һәм ритейл-бук төҙөүҙе үҙ өҫтөбөҙгә алабыҙ. Бынан тыш, проектта ҡатнашыусыларға МСП банкынан махсус, уңайлы шарттарҙа кредит алыу мөмкинлеге бирәбеҙ. Беҙҙең «Фермер утрауы» – 10-25 фермерҙы берләштереп, бер нисә эшҡыуарға бергә тупланыу мөмкинлеге», – тине Бәләкәй һәм урта эшҡыуарлыҡ корпорацияһының генераль директоры Александр Исаевич.

«Илдәге беренсе «Фермер утрауы»нда беренсе булып ҡатнашыуым менән ғорурланам, – тине Башҡортостандың Шишмә районында урынлашҡан ауыл хужалығы ҡулланыусылар кооперативы етәксеһе Вилена Дәүләтова. – Кесе һәм урта эшҡыуарлыҡ корпорацияһына ошондай сауҙа нөктәһен ойошторған өсөн ҙур рәхмәт».

Белешмә:

«Фермер утрауы» сауҙа нөктәләрен урынлаштырыу буйынса пилот проекты алты айға иҫәпләнгән. Ошо ваҡыт эсендә «Магнит» һәм «Пятерочка» магазиндары булған биш төбәктә тағы ла тиҫтәнән ашыу майҙансыҡ ойоштороу күҙаллана. Йыл аҙағынаса Новосибирск һәм Омск өлкәләрендә лә «утрауҙар» асыла («Пятерочка» сауҙа селтәре менән берлектә). 2022 йылда проектты Төмән, Мәскәү өлкәләрендә һәм башҡа төбәктәрҙә проектты бойомға ашырыу күҙаллана. Проекттың артабанғы маҡсаты – ил кимәленә сығыу. 

Автор:Азат Ғиззәтуллин