Башҡортостандың тышҡы сауҙа әйләнеше ғинуар-сентябрҙә 3,4 миллиард доллар тәшкил иткән

Федераль таможня хеҙмәте мәғлүмәттәре буйынса, әйләнеш күрһәткесе уҙған йылдың осоронан 28% юғарыраҡ. Экспорт күләме — 25%, импорт 41,5% артҡан.

Экспортта сеймалға һәм энергетикаға ҡарамаған тауарҙар өлөшө 68% тәшкил иткән. Сит илгә 1,8 миллиард долларлыҡ ошондай продукция һатылған. Был 2020 йылға ҡарағанда 43% күберәк.

Башҡортостан экспортының нигеҙен алты төп тауар төркөмө: нефть һәм нефть продукттары, химия сәнәғәте продукцияһы һәм каучук, машина эшләү, аҙыҡ-түлек һәм уның өсөн сеймал, ағас һәм целлюлоза-ҡағыҙ изделиелары, металл һәм уларҙан изделиелар тәшкил итә, тип белдерҙеләр Башҡортостандың Тышҡы иҡтисади эшмәкәрлек буйынса дәүләт комитетында.

Төбәктәр рейтингында Башҡортостан экспорт буйынса 25-се урынды биләй, шул уҡ ваҡытта республика карбонат, ағас-юнысҡы плитәләр, арҡандар, шнурҙар һәм поливинилхлорид экспорты йәһәтенән беренсе; турбодвигателдәр һәм газ турбиналарын оҙатыу буйынса икенсе; кальцийлы сода экспорты йәһәтенән өсөнсө урында тора, тип билдәләнеләр дәүләт комитетында.

Ҡытай, Ҡаҙағстан, Беларуссия, Нидерланд, Финляндия, Төркиә, АҠШ, Германия, Латвия, Үзбәкстан 2021 йылдың ғинуар-сентябрендә Башҡортостандың ун контрагент иле исемлегенә инде. Был илдәр менән сауҙа әйләнеше 2 миллиард долларҙан ашыу тәшкил иткән (тышҡы сауҙа әйләнешенең дөйөм күләменән 62 процент).