Өфөнөң тарихи үҙәгендә яңы балалар баҡсаһы төҙөлә

Өфө хакимиәте Ленин районында  Солтанов, Чернышевский, Ғафури һәм Сверлов урамдары менән сиктәш биләмәне планировкалау һәм межалау проекттарын раҫланы. Баш ҡала мэры Сергей Греков ҡул ҡуйған тейешле ҡарар ҡала хакимиәте сайтында баҫылған.

Биләмәнең дөйөм майҙаны — 8,37 гектар. Документҡа ярашлы, был  участкала административ биналар, Юғары спорт оҫталығы мәктәбе, күп фатирлы йорттар урынлашҡан, яңы йорттар төҙөлә.

Документта билдәләнеүенсә, ҡала мэрияһы Солтанов — Коммунистик — Свердлов — Ғафури кварталы үҙәгендәге участкала яңы балалар баҡсаһы һалырға йыйына. Шулай уҡ бассейн һәм ер аҫты паркингы менән фитнес-үҙәк төҙөү планлаштырыла.

Бынан алда «Башинформ» «Йәшел сауҡалыҡ» шифаханаһы янында яңы күп ҡатлы йорттар ҡалҡып сығасағын хәбәр иткәйне.