Башҡортостанда уртаса хеҙмәт хаҡы 40 мең һумға еткән — Радий Хәбиров

2021 йылдың ғинуар-июнь айҙарында Башҡортостанда уртаса хеҙмәт хаҡы артып, 40 236 һум тәшкил иткән. Был хаҡта республика хөкүмәтендәге оператив кәңәшмәлә Радий Хәбиров белдерҙе.

«Тәүге тапҡыр уртаса хеҙмәт хаҡы 40 мең һумдан артты. Ошо мөһим күрһәткескә етдиерәк ҡарарға кәрәк. Был бик юғары эш хаҡы түгел, беҙҙә ошо сумманан аҙыраҡ алған кешеләр байтаҡ. Башҡараһы эштәр күп әле. Беҙҙә инвестиция һала башлаған коллегаларыбыҙ менән эш хаҡы кимәле тураһында пункт индереү хаҡында уйлашырға кәрәк. Эшһеҙлек кимәленең кәмей барыуын да әйткем килә. Йылды яҡшы тамамларбыҙ тип ышанам», — тине Радий Хәбиров.

Ярты йылдаа уртаса хеҙмәт хаҡы номиналь сағылышта — 8,4%, реаль сағылышта 2,7% артып, 40 236,1 һумға еткән. Ағымдағы йылдың 24 авгусына рәсми теркәлгән эшһеҙлек кимәле 1,88% тәшкил иткән. Радий Хәбиров 2021 йылдың ғинуар-июлендә сәнәғәт етештереүе индексының да артыуын хәбәр итте. Уҙған йылдың ғинуар-июль айҙарына ҡарата 3,5% күберәк.