Башҡортостанда Өфөнән Көнсығыш сығыу юлында тоннель һалынды

Көнсығыш сығыу юлы төҙөүселәре тау аҫтынан тоннель һалды һәм иң ҡатмарлы эштәрҙең береһен тамамланы. Тоннелдең оҙонлоғо – 1 276 метр. Максималь тәрәнлеге – 63 метр. Бөгөн Башҡортостан Башлығы Радий Хәбиров һәм Федераль юл агентлығы етәксеһе вазифаһын ваҡытлыса башҡарыусы Роман Новиков Волга буйы федераль округындағы иң ҙур инфраструктура проекттарының береһен төҙөү урынында булды.

Әлеге ваҡытта бында меңдән ашыу кеше эшләй, 124 берәмек төҙөлөш техникаһы һәм ҡорамал йәлеп ителгән. Көнсығыш сығыу юлы төҙөлөшөн яңынан башлағандан алып 3,3 миллиард һум үҙләштерелгән.

Роман Новиков һүҙҙәренсә, Өфөнән Көнсығыш юлының әһәмиәте бик ҙур.

«Көнсығыш сығыу юлы ҡала һәм төбәк автомобиль юлдарын бушатырға мөмкинлек бирә, ике федераль трассаны үҙ-ара тоташтыра, ҡала аша йөрөү уңайлығын яҡшырта», — тине Федераль юл агентлығы етәксеһе вазифаһын башҡарыусы, журналистарҙың һорауҙарына яуап биреп.

Концессия килешеүен ҡабаттан ҡарау һәм оптималләштереү һөҙөмтәһендә лә Көнсығыш сығыу юлы төҙөлөшөн яңынан башлап ебәрергә мөмкин булды, тип билдәләне Радий Хәбиров. Концессия договорына өҫтәмә килешеү республика бюджетына йөкләмәне 30 миллиард һумға кәметте.

«Был хәҙер иҡтисади яҡтан да файҙалы проект, партнерҙарыбыҙ ҙа һәйбәт. Бында эш ойошҡанлы бара. Проектты көтәбеҙ, 2024 йылға бында тәүге автомобилдәр йөрөй башларға тейеш», — тине республика етәксеһе.

Хәтерегеҙгә төшөрәбеҙ, Көнсығыш сығыу юлында төҙөлөш эше 2020 йылдың ғинуарында тергеҙелде. Объекттың генераль подрядсыһы – Төркиәнең «Лимакмаращавтодороги» компанияһы».