Республика аграрийҙары 1,2 миллион тоннаға яҡын сенаж әҙерләгән

Республика райондарында 1 миллион 176 мең тонна сенаж әҙерләнгән. Башҡортостан Республикаһы Ауыл хужалығын консультациялау үҙәгенең 21 июлгә мәғлүмәттәре шундай. Былтыр ошо көнгә күрһәткес өстән бер өлөшкә аҙыраҡ булған. Бөтәһенән дә күберәк ҡышҡылыҡҡа һутлы мал аҙығын Дүртөйлө һәм Илеш райондары аграрийҙары әҙерләгән – һәр береһендә 81 мең тонна. Бесән әҙерләү буйынса 45,2 мең тонна күрһәткесе менән Хәйбулла районы алда бара.

Башҡортостанда бөтәһе 697 мең тонна тупаҫ аҙыҡ һалынған. Ҡышҡылыҡҡа мал аҙығы менән тәьмин ителеш кимәле һәр шартлы баш малға 16,5 центнерға еткән, тип белдерҙеләр Башҡортостан Ауыл хужалығы министрлығының матбуғат хеҙмәтендә.