Өфөлә апрель башына урамда рөхсәтһеҙ һатыу итеү бөтөрөлөргә тейеш

Өфө хакимиәте башлығы Өлфәт Мостафин апрель башына урамда рөхсәтһеҙ сауҙа итеүҙе бөтөрөү бурысын ҡуйҙы. Башҡортостандың баш ҡалаһында бындай хоҡуҡ боҙоуҙар, башлыса, йәйәүлеләр күп йөрөгән урындарҙа күҙәтелә, мәҫәлән, «Өфө» универмагы» туҡталышындағы ер аҫты үткәүелендә һатыу итеүгә бәйле дәғүәләр күп.

Өфөлә граждандар өсөн 20 сауҙа майҙансығы эшләй, йыл аҙағына уларҙың һанын тағы ла 8-гә арттырыу күҙаллана. Шулай уҡ сауҙа комплекстары биләмәһендә махсус бүленгән урындар бар, ләкин уларҙың 43% ғына тулы. Был тәү сиратта һатыу итеүселәрҙең үҙ тауарын халыҡ күп йыйылған урындарҙа һатыу теләге менән бәйле.

Былтыр Өфө урамдарында законһыҙ сауҙа өсөн 5,6 миллион һумға 7,3 мең штраф һалынған, был 2018 йылға ҡарағанда 580 меңгә күберәк. Ләкин уларҙы түләү суммаһы үҙгәрешһеҙ ҡалған – 3,5 миллион һум кимәлендә. Штрафтың уртаса күләме – 750 һум, ә административ комиссиялар граждандарға 1,5 мең һумға еткән штраф һалмай тиерлек.

Өфө хакимиәте башлығы урынбаҫары Николай Фадеев хәлде үҙгәртеү өсөн ҡала властарының Башҡортостан Республикаһының Сауҙа һәм ҡулланыусылар хоҡуҡтарын яҡлау буйынса дәүләт комитетына сауҙа ҡағиҙәләрен ҡабаттан боҙған өсөн штрафтарҙы арттырыу тураһында закон сығарыу башланғысы менән сығырға кәрәк тигән тәҡдим индереүҙәрен әйтте. Хәҙер рөхсәтһеҙ һатыу иткән өсөн 500 һумдан алып 1500 һумғаса штраф һалыныуы мөмкин. Был сумманы – 1-3 мең һумға, ә ҡабаттан боҙған осраҡта 3-5 мең һумға тиклем арттырырға тәҡдим ителә.