«Алексеевка» совхозы» предприятиеһы устав капиталын 2,3 тапҡырға арттырҙы

ӨФӨ, 2020 йыл, 7 февраль. /«Башинформ» мәғлүмәт агентлығы/. «Алексеевка» совхозы» дәүләт предприятиеһы устав капиталын ике тапҡырҙан ашыуға арттырҙы. Киң мәғлүмәт саралары яҙыуынса, 4 февралдә агрофирманың устав фонды 153,57 миллиондан 348,68 миллионға тиклем артты. Совхозды ойоштороусы – Башҡортостандың Ауыл хужалығы министрлығы «Интерфакс»ҡа быны предприятиеға Республика адреслы инвестиция программаһы сиктәрендә теплицаларҙы яңыртыу өсөн аҡса бүлеү менән бәйле тип аңлатты.

«Алексеевка» совхозы» заманса теплицалар төҙөү буйынса дәүләт-шәхси партнерлыҡ форматында инвестиция проектын тормошҡа ашыра. Һалынған аҡсаның дөйөм күләме – 10 миллиард һумдан ашыу. Кредитор менән килешеүгә 2019 йылдың июнендә ҡул ҡуйылды.

Дәүләт компанияһы 37 гектарҙағы иҫке теплицаларҙы бөтөрөп, 45 гектарҙа теплица комплексы төҙөргә ниәтләй. Проект 2024 йылға тиклем бер нисә этапҡа бүленгән, баҙарҙа проблемалар килеп тыуған осраҡта уны теләһә ниндәй баҫҡыста туҡтатырға мөмкин, тине дәүләт предприятиеһы етәксеһе Рәмзил Низаметдинов проекттың презентацияһында.