Яңы резидент «Күмертау» йылдам социаль-иҡтисади үҫеш биләмәһенә балалар аҙығы етештереү өсөн 6,5 миллион һум һала

ӨФӨ, 2019 йыл, 21 октябрь. /«Башинформ» мәғлүмәт агентлығы, Азат Ғиззәтуллин/. «Рацион» яуаплылығы сикләнгән йәмғиәте «Күмертау» йылдам социаль-иҡтисади үҫеш биләмәһенең 13-сө резиденты булырға йыйына. Предприятие балалар өсөн юғары дәрәжә әҙерлекле ярымфабрикаттар етештерергә ниәтләй. Проект 6,5 миллион һум күләмендә инвестиция һалыуҙы һәм 30 яңы эш урыны булдырыуҙы күҙ уңында тота. Ултырыш йомғаҡтарына ярашлы, комиссия ошо проект буйынса ыңғай ҡарар ҡабул итте.

Өҫтөнлөктәр бөтә резиденттар өсөн дә стандарт. Тәүге биш йылда килемгә һалымдың төбәк өлөшө нулгә тиң була. Икенсе биш йыллыҡта — 5%. Бынан тыш, йылдам социаль-иҡтисади үҫеш биләмәһе осоронда страховка взностары буйынса льготалар һаҡлана. «Йылдам социаль-иҡтисади үҫеш биләмәһе» статусы 10 йыл ғәмәлдә була.