Бәләбәй ҡалаһында йылдам үҫеш биләмәһенең өс яңы резиденты теркәлде

ӨФӨ, 2019 йыл, 28 август. /«Башинформ» мәғлүмәт агентлығы/. «Бәләбәй» йылдам социаль-иҡтисади үҫеш биләмәһендә өс яңы резидент теркәлде, тип белдерҙеләр Башҡортостандың Иҡтисади үҫеш министрлығында. «Башпеностекло» яуаплылығы сикләнгән йәмғиәте күбекле быяла етештереү заводына 270 миллион һум аҡса һала һәм 32 эш урыны булдыра. Заводтың продукцияһы – быяла блоктар, плитәләр һәм башҡа изделиелар. Бынан тыш, витраждар өсөн быяла етештереү ҡаралған.

«Стройинвест» предприятиеһы тимер конструкциялар етештереүҙе ойошторорға ниәтләй. Проектты тормошҡа ашырыу яҡынса 7,7 миллион һум йәлеп итергә һәм 82 эш урыны булдырырға мөмкинлек бирә.

Өсөнсө резидент – «Наш Хлеб» яуаплылығы сикләнгән йәмғиәте. Компания икмәк, кондитер ризыҡтары, торттар һәм пирожныйҙар бешереүгә махсуслаша. Инвестициялар күләме 5,2 миллион һум тәшкил итә. Яңы эш урындары һаны – 82.

Башҡортостан биләмәһендә йылдам социаль-иҡтисади үҫеш биләмәһе резиденттары реестрына 28 авгусҡа бөтәһе 26 инвестор индерелгән: Бәләбәйҙә һәм Күмертауҙа — 12-шәр, Нефтекамала — 2.