Өфөлә икенсе ПЭТ-сканер эшләй башланы: Ядро медицинаһы үҙәге 2,5 тапҡырҙан күберәк сирлеләрҙе ҡабул итә ала

автор

IMPORT Сервисный

ӨФӨ, 2019 йыл, 31 июль. /«Башинформ» мәғлүмәт агентлығы, Азат Ғиззәтуллин/. Өфөлә ПЭТ-Технолоджи ядро медицинаһы үҙәгендә пациенттар һанын 2,5 тапҡырға арттырыу һәм онкология сирҙәрен асыҡлау мөмкинлеген биргән икенсе ПЭТ-сканер эшләй башланы. Хәҙер үҙәк йылына 12 000 ашыу пациентты ҡабул итә ала. Медицина учреждениеһының биш йыл эшләү осоронда табиптар 22 000 күберәк кешегә онкология ауырыуҙарын асыҡлауҙа һәм дауалауҙа ярҙам күрһәткән. Баш табип Эмма Мөхәмәтханова ПЭТ-үҙәкте ҡараған саҡта Башҡортостан етәксеһе Радий Хәбировҡа ошо хаҡта һөйләне. Уның һүҙҙәренсә, ПЭТ/КТ — онкология сирҙәрен диагностикалауҙа һөҙөмтәле һәм заманса алым. Ул бәләкәй генә шеште лә ауырыуҙың иртә стадияһында асыҡларға мөмкинлек бирә, был онкология сирҙәрен дауалауҙа бик мөһим.

Хәтерегеҙгә төшөрәбеҙ, Сочиҙағы инвестиция форумында Башҡортостан Хөкүмәте һәм «МедИнвестГрупп» компаниялар төркөмө араһында килешеү төҙөлдө. Ул онкология ауырыуҙарын диагностикалау һәм дауалау йәһәтенән республика мөмкинлектәрен киңәйтеү өсөн бер нисә проектҡа үҙенең инвестициялары тураһында белдерҙе. Икенсе ПЭТ-сканерҙы сафҡа индереү өсөн инвестициялар суммаһы – 200 миллион һум. «МедИнвестГрупп» компаниялар төркөмө яман шешкә ҡаршы көрәшкә бөтәһе 1 миллиард һум аҡса һала.

Радий Хәбиров Ядро медицинаһының мөмкинлектәре менән танышты, уға онкология сирҙәрен дауалауҙа ҡулланылған яңы технологиялар тураһында һөйләнеләр, заманса ҡорамалдарҙы күрһәттеләр.

Бөгөн Ядро медицинаһы үҙәгендә Рәсәй өсөн үҙенсәлекле булған радиофармпрепараттар етештереү, сифат контроле һәм илтеп биреү системаһы ла эшләй. Улар күкрәк биҙе, ирҙәрҙең енес биҙе шешен, меланоманы асыҡларға мөмкинлек бирә. Өфөләге етештереү үҙәге көн һайын 70 дозаға тиклем дарыу әҙерләй.

Үҙәктәге КиберБысаҡ – әлеге ваҡытта Рәсәй биләмәһендә иң замансаһының береһе. Был технология 25 йылдан ашыу ҡулланылһа ла, бөгөн донъяла бөтәһе 250 ошондай ҡулайлама бар. КиберБысаҡ онкология сирҙәрен дауалағанда хирургик операцияларға альтернатива итеп файҙаланыла. Хәҙерге көндә 1600 пациент дауаланған.

Радий Хәбиров үҙәкте ҡарап сыҡҡандан һуң журналистарға биргән интервьюһында яңы ПЭТ-сканерҙы сафҡа индереү онкология ауырыуҙарын дауалау өлкәһендә дәүләттең бизнес менән уңышлы хеҙмәттәшлеген күрһәтә тип билдәләне.

«Ошо иҫ киткес ҡорамал табиптарға сирҙе асыҡтан-асыҡ күрергә, дауалау алымын, уның һөҙөмтәләрен билдәләргә мөмкинлек бирә. Шуныһы мөһим: бында мотлаҡ медицина страховкалауы фонды квоталары аша дауалайҙар һәм үҙәккә дауаланыуға йүнәлтмә алған пациенттар өсөн фонд түләй. Барлыҡ эш 21-се быуат кимәлендә ойошторолған», — тине Башҡортостан етәксеһе.

Радий Хәбиров эш кәңәшмәһендә «МедИнвестГрупп» компаниялар төркөмө етәкселеге менән тикшергән берлектәге пландар хаҡында ла һөйләне.

«Республикабыҙ ҙур, донъя стандарттары буйынса 1 миллион кешегә ошондай ҡорамал кәрәк, ә беҙҙә әлегә бөтәһе 2 ПЭТ-сканер. Коллегаларыбыҙ менән Стәрлетамаҡта республиканың көньяғында йәшәүселәр өсөн шундай уҡ ҡорамал ҡуйырға тип килештек. Ауыр сиргә дусар булған пациенттарыбыҙға дауаланыу өсөн уңайлы шарттар булдырырға тейешбеҙ», – тип билдәләне республика етәксеһе.

Уның һүҙҙәренсә, Ядро медицинаһы үҙәге һәм республика онкология диспансеры янында Өфөгә дауаланырға килгән пациенттарға социаль ятаҡ төҙөү өсөн ер участкаһы бүленә.

1 из 4

http://www.bashinform.ru/news/1335808-v-ufe-zapustili-vtoroy-pet-skaner-tsentr-yadernoy-meditsiny-primet-v-2-5-raza-bolshe-bolnykh/

#радий хәбиров #ядро медицинаһы үҙәге #онкология

Яңылыҡтарҙы тиҙерәк уҡыу өсөн социаль селтәрҙәргә ҡушылығыҙ:

Рубрикалар

Рубрикалар

Үҙебеҙҙекеләрҙе ташламайбыҙ

Медицина

Форматтар

Яңылыҡтар

Мәҡәләләр

Адрес

450077, Өфө, Киров урамы, 45 (347) 250-05-07

Рекламная служба

(347) 250-11-11 adv@bashinform.ru

Редакция

(347) 250-07-28 inf@bashinform.ru

© 1992-2026 «Башинформ» мәғлүмәт агентлығы» акционерҙар йәмғиәте. ТУ 02-01609 һанлы киң мәғлүмәт сараһын теркәү тураһындағы таныҡлыҡ Элемтә, мәғлүмәт технологиялары һәм киң коммуникациялар өлкәһендә күҙәтеү буйынса федераль хеҙмәттең Башҡортостан Республикаһы буйынса идаралығы тарафынан 2017 йылдың 25 сентябрендә бирелгән.

Об использовании персональных данных

Bashinform.ru сайтында баҫылған бөтә мәғлүмәттәр һәм мәҡәләләр халыҡ-ара һәм Рәсәй авторлыҡ хоҡуғы һәм уға бәйле хоҡуҡтар тураһындағы ҡануниәте менән яҡланған. «Башинформ» мәғлүмәт агентлығының бөтә хәбәрҙәре лә 18 йәштән өлкән ҡулланыусыларға тәғәйенләнгән.

18+

Мәҡәләләрҙе күсереп баҫҡанда, йә уларҙы өлөшләтә файҙаланғанда «Башинформ» мәғлүмәт агентлығына һылтанма яһау мотлаҡ. Интернет-баҫмалар һәм социаль селтәрҙәр өсөн тура актив гиперһылтанма мотлаҡ. «Башинформ» мәғлүмәт агентлығы логотибын мәҡәләләрҙе күсереп алғанда йәки цитаталар килтергәндә агентлыҡҡа һылтанма менән бәйле булмаған маҡсаттарҙа файҙаланыу өсөн «Башинформ» мәғлүмәт агентлығы акционерҙар йәмғиәтенең яҙма рөхсәте кәрәк.

«Башинформ» мәғлүмәт агентлығы логотибын ҡулланыу, сайттағы мәғлүмәттәрҙе һылтанма менән күсереп баҫыу һәм өлөшләтә ҡулланыу осраҡтарынан тыш, акционерҙар йәмғиәтенең яҙма ризалығы менән генә рөхсәт ителә.