Яңы Булгаковта тағы бер проблемалы йорт файҙаланыуға тапшырылды

ӨФӨ, 2019 йыл, 29 июль. /«Башинформ» мәғлүмәт агентлығы/. Яңы Булгаков торлаҡ комплексында 36 ғаиләгә иҫәпләнгән 32 литер Б йорто файҙаланыуға тапшырылды. Башҡортостандың Төҙөлөш һәм архитектура буйынса дәүләт комитеты уны июль аҙағына сафҡа индерергә вәғәҙә биргәйне. Ведомствола билдәләүҙәренсә, йәшәүселәргә һәм төҙөүсегә күсенгәнсе йылытыу, һыу менән тәьмин итеү мәсьәләләрен хәл итергә кәрәк. «Әлеге ваҡытта инженер системалары йыйылған. Йортта йәшәүселәр шәхси иҫәп асҡандан һәм өй эсендә газ хужалығы килешеүҙәрен төҙөгәндән һуң газ биреү күҙаллана. Шәхси иҫәп өлөшсөләр торлаҡҡа милек хоҡуғын теркәгәс асыла. Йортҡа йылы бирелгәс, һыу тәьминәте эшләй башлай», — тип белдерҙеләр Төҙөлөш һәм архитектура буйынса дәүләт комитетында.

30 июндә 36 ғаилә 15-се кварталдың 10-сы йортонан фатир асҡыстарын алды. Яңы Булгаковта тағы дүрт йортто тапшырырға кәрәк, уларҙы йыл аҙағына тиклем төҙөп бөтөү күҙаллана.