Быйыл республикала иген культураларының уңышы 3 миллион тонна кимәлендә көтөлә

ӨФӨ, 2019 йыл, 25 июль. /«Башинформ» мәғлүмәт агентлығы, Азат Ғиззәтуллин/.Республикала иген уңышы уртаса күп йыллыҡ күрһәткестәрҙән юғары, 3 миллион тонна кимәлендә көтөлә, тине Башҡортостан хөкүмәте премьер-министры урынбаҫары вазифаһын башҡарыусы – ауыл хужалығы министры Илшат Фәзрахманов Күгәрсен районына үткән «Баҫыу көнө» семинарында. Аграрийҙар шулай уҡ 300 мең тонна көнбағыш, 50-60-шар тонна рапс һәм гәрсис йыйырға күҙаллай. Уңышты урынлаштырыу өсөн төбәктә 2,5 миллион тонна ҡеүәткә эйә 37 элеватор, ауыл хужалығы предприятиеларының 2 миллион тонналыҡ иген һаҡлағыстары бар. Илшат Фәзрахманов яңы уңышты һатырға ашыҡмаҫҡа кәңәш итте.

Республиканың ауыл хужалығы предприятиеларында 3634 иген урыу комбайны иҫәпләнә, республика буйынса бер беремеккә йөк уртаса 470 гектар тәшкил итә (норматив – 350), 2011 йылда 550 гектар ине, тип билдәләнде. Йыл аҙағынаса аграрийҙар тағы 90 яңы комбайн һатып алырға күҙаллай, ул бер йыйыу берәмегенә йөктө 460 гектарға тиклем кәметергә мөмкинлек бирә. Иген культураларын йыйыу ваҡыты уртаса 45-47 календарь көн тәшкил итәсәк.

Ауыл хужалығы министрлығының матбуғат хеҙмәтендә «Баҫыу көнө» 25 июлдә «Тәүәкән» ауыл хужалығы предприятиеһы базаһында уҙҙы тип һөйләнеләр. Күгәрсен районында беренсе тулы форматлы зона семинары үтте. Ҡатнашыусылар етештереү һәм һынау иген һәм техник культуралар, картуф участкаларын ҡараны, заманса техника өлгөләре менән танышты. Семинарҙа Урал алды дала зонаһында иген йыйыу кампанияһына старт бирелде.

Быйыл республика игенселәренә 1,7 миллион гектарҙа иген һәм ҡуҙаҡлы культураларҙы (былтырғынан 5 процентҡа аҙыраҡ) йыйыу тора, уларҙан 252 мең самаһы гектар – ужым, шулай уҡ 48 мең гектар шәкәр сөгөлдөрө һәм 396 мең гектар майлы культуралар.