Башҡортостанда газондағы парковка өсөн штраф тураһында закон аҙаҡҡы ҡарауға индерелде

ӨФӨ, 2019 йыл, 4 апрель. /«Башинформ» мәғлүмәт агентлығы, Станислав Шахов/. Республика Дәүләт Йыйылышы комитеты депутаттары газондағы парковка өсөн штраф тураһында закон проекты өҫтөндәге эште тамамланы. Аҙаҡҡы редакцияла йәшелләндерелгән биләмәнең билдәләмәһе генә үҙгәртелде. Был — «йәйәүлеләр, велойәйәүлеләр һәм велосипед юлдарының, юлдарҙың ҡаты япмаһы менән сиктәш булған үлән, сәскә һәм (йәки) ағас-ҡыуаҡтар менән ҡапланған ер участкаһы».

Депутаттар икенсе уҡыуға бөтәһе һигеҙ төҙәтмә тәҡдим итте. Әйтәйек, Дмитрий Чувилин йортта йәшәүселәргә «парковка өсөн файҙаланылған» биләмәләрҙә машиналарын ҡалдырырға рөхсәт итеү тәҡдимен индерҙе. Уға ҡаршы төштөләр, сөнки халыҡ милекселәр йыйылышын үткәреп, үҙҙәренең ихатаһында ҡайҙа парковка булырға тейешлеген хәл итеүе мөмкин.

«Беҙ бындай ҡарарҙарға ҡамасауламаҫбыҙ», — тине Өфө мэрының беренсе урынбаҫары Салауат Хөсәйенов.

Депутат Александр Дегтев төрлө машиналар өсөн эҙмә-эҙлелек тәҡдим итте. Уның фекеренсә, юридик берәмек исемендә булған һәм газонда ҡалдырып кителгән бәләкәй автомобиль шәхси йөк машинаһына ҡарағанда аҙыраҡ зыян килтерә, ә штрафты күберәк түләй. Бынан тыш, депутат әйтеүенсә, закон ҡуртымға алынған машиналарҙың парковкаһы өсөн яуаплылыҡты иҫәпкә алмай. Кеше ҡуртымға алынған автомобилде газонда ҡалдырып китә, юридик берәмеккә штраф яҙыла, ә ысынында уны ғәйепле водитель түләй.

Был төҙәтмәләр ҙә үтмәне. Юристар әйтеүенсә, ҡануниәт автомобилдең ҙурмы-бәләкәйме икәнен айырып ҡарамай, ә автомобилде ҡуртымға алған осраҡта штраф былай ҙа юридик берәмеккә түгел, ә водителгә һалына.

Ҡалған төҙәтмәләр техник характерҙа булды йәки башҡа закондар менән көйләнде.