Радий Хәбиров: Өлөшсөләрҙең хоҡуҡтарын тергеҙеү проблемаһын мотлаҡ хәл итербеҙ

ӨФӨ, 2019 йыл, 2 апрель. /«Башинформ» мәғлүмәт агентлығы/. Кисә Республика Йортонда Башҡортостан Башлығы вазифаһын ваҡытлыса башҡарыусы Радий Хәбиров өлөшләтә төҙөлөштә ҡатнашыусыларҙың инициативалы төркөмдәре вәкилдәре менән осрашты. Осрашыуҙа ағымдағы хәл һәм «Миловка паркы», «Көмөш шишмә», «Башҡортостан сәскәләре» торлаҡ комплекстары, «БашИнвестДом», «Меркурий», «Төҙөүсе» (Өфө), «Интеграл» (Нефтекама), «Башстрой» (Стәрлетамаҡ) йәмғиәттәре төҙөгән йорттар өлөшсөләренең боҙолған хоҡуҡтарын тергеҙеү мөмкинлектәре тикшерелде, тип хәбәр итә республика Башлығының матбуғат хеҙмәте.

«Беҙҙә өлөшсөләрҙең хоҡуҡтарын тергеҙеү эше системалы алып барыла. Бының менән үҙем шөғөлләнәм. Һәр дүшәмбе «Төҙөлөш сәғәте»н алданған өлөшсөләрҙең һорауҙарын ҡарауҙан башлайбыҙ, – тине Радий Хәбиров. – Артабан да һеҙҙең менән осрашырға әҙермен. Был эш – беҙҙең иғтибар үҙәгендә. Был беҙҙең – дөйөм проблема, уны мотлаҡ хәл итербеҙ».

Бөтә мәсьәләләр ҙә конструктив хәл ителергә тейеш, тип билдәләне төбәк етәксеһе. Объекттар төҙөлөшөн тамамлауҙың финанс һәм юридик схемаларын әҙерләү, инвесторҙар эҙләү өсөн дәүләт яуаплы.