Өфөлә урамдарҙы төнгө яҡтыртыу графигын үҙгәртәләр

ӨФӨ, 2018 йыл, 13 ноябрь. /«Башинформ» мәғлүмәт агентлығы, Азат Ғиззәтуллин/. Өфө хакимиәте башлығы Өлфәт Мостафин бөгөн, 13 ноябрҙә, мэриялағы оператив кәңәшмәлә республиканың баш ҡалаһында төнгө яҡтыртыу графигының үҙгәреүе хаҡында белдерҙе. «Өфөлә фонарҙар төнгө сәғәт 1-ҙән таңғы 5-кә тиклем генә һүндерелә», — тине Өлфәт Мостафин.

Кисә республика Хөкүмәтендәге оператив кәңәшмәлә Башҡортостандың тораҡ пункттарында урамдарҙы яҡтыртыу мәсьәләһе тикшерелде. Уҙғарылған мониторинг һөҙөмтәләре күрһәтеүенсә, республика ҡала-райондарында урамдарҙы һәм тыҡрыҡтарҙы яҡтыртыу 67,8 процент тәшкил итә. Өҫтәүенә 25 муниципалитетта был уртаса республика күрһәткесенән түбәнерәк, ә ҡайһы бер тораҡ пункттарҙа 30 процентҡа ла етмәй. Бынан тыш, 2,5 мең балалар баҡсаһы һәм мәктәптәрҙең 592-һендә 500 метр радиусында тейешле фонарҙар юҡ.

Төбәк етәксеһе һүҙҙәренсә, яҡтыртыуҙы тәү сиратта йылдам ҡарарҙар, атап әйткәндә, урамдарҙа терәүҙәре һәм линиялары булған фонарҙарҙы монтажлау иҫәбенә арттырырға кәрәк. Муниципалитеттарға киске һәм иртәнге сәғәттәрҙә эш ваҡытын арттырып, төндә яҡтыртыу системаларының эш графигын ҡайтанан ҡарау бурысы йөкмәтелде.

http://www.bashinform.ru/news/1237619-v-ufe-pomenyayut-grafik-nochnogo-osveshcheniya-ulits-i-dvorov/