Өфөлә Башҡорт дәүләт университетына ике яңы ятаҡ төҙөйҙәр

ӨФӨ, 2018 йыл, 6 ноябрь. /«Башинформ» мәғлүмәт агентлығы/. Өфөлә Башҡорт дәүләт университетына ике яңы ятаҡ төҙөйҙәр, тип хәбәр ителә Дәүләт Думаһының «Берҙәм Рәсәй» фракцияһы сайтында. Улар юғары уҡыу йортоноң төп корпусына алыҫ түгел ерҙә урынлашасаҡ. Беренсе ятаҡты – 2020 йылға, икенсеһен 2025 йылға төҙөү күҙаллана. Ошо хаҡта Өфөләге кәңәшмәлә әйтелде. Уны Дәүләт Думаһының бюджет һәм һалым буйынса комитеты ағзаһы, фракция депутаты Илдар Бикбаев уҙғарҙы.

Парламентарий һөйләүенсә, 2016 йылда ауыл биләмәләрендә булғанда ул ятаҡтарҙа урын етмәү, шул сәбәпле студенттарға ҡуртымға торлаҡ алырға мәжбүр булыу тураһында байтаҡ фекерҙәр ишеткән. Һөҙөмтәлә Рәсәйҙең Мәғариф министрлығы һәм Иҡтисади үҫеш министрлығы булышлығында Башҡорт дәүләт университетына өҫтәмә корпустар төҙөүгә федераль бюджеттан 300 миллион һум самаһы бүлеүгә ирешеп булды.

Республиканың Өфө дәүләт нефть техник университеты кеүек ҙур юғары уҡыу йорто ла яңы ятаҡҡа мохтаж. Унда 17 мең Рәсәй һәм сит ил студенты белем ала. Илдар Бикбаев Өфөлә, Мәскәүҙә төҙөлөп бөтөп килгән, Рәсәй халыҡтар дуҫлығы университетында булып, уның кампус проекты менән файҙаланырға тәҡдим итте.

http://www.bashinform.ru/news/1233903-v-ufe-postroyat-dva-novykh-obshchezhitiya-bashgu/