Башҡортостандың Юл фондын штрафтар иҫәбенә 1,6 миллиард һумға арттыралар

ӨФӨ, 2018 йыл, 23 октябрь. /«Башинформ» мәғлүмәт агентлығы, Розалиә Вәлиева/. Башҡортостандың Юл фондын юл хәрәкәте ҡағиҙәләрен боҙған өсөн штрафтар иҫәбенә 1,6 миллиард һумға арттыралар. Был хаҡта Башҡортостан Дәүләт Йыйылышы — Ҡоролтайҙың матбуғат хеҙмәтенән хәбәр иттеләр.

Башҡортостан Республикаһы Дәүләт Йыйылышы – Ҡоролтай депутаттары алдағы пленар ултырышта 2019 йылдың 1 ғинуарынан Рәсәй Федерацияһының юл хәрәкәте хәүефһеҙлеге тураһында ҡануниәтен боҙған өсөн штрафтар рәүешендә республиканың Юл фондын булдырыуҙың яңы сығанағын индереүҙе күҙ уңында тотҡан «Башҡортостан Республикаһының Юл фонды тураһында» Башҡортостан Республикаһы законына үҙгәрештәр индереү тураһында»ғы закон проектын ҡарарға ниәтләй.

«Закон проекты федераль ҡануниәттәге һуңғы новацияларға ярашлы әҙерләнгән. Уны бер юлы өс уҡыуҙа ҡарау күҙаллана», – тип аңлатма бирҙе Башҡортостан Республикаһы Дәүләт Йыйылышы – Ҡоролтай рәйесе Константин Толкачев.

Закон ҡабул ителгән осраҡта, республиканың Юл фонды йыл һайын яҡынса 1,6 миллиард һумға арттырыла. Әлеге ваҡытта республиканың тупланма бюджетына аҡса штраф рәүешендә инә. Уларҙы Юл фондына ҡабаттан бүлеү ошо аҡсаны дөйөм ҡулланылыштағы автомобиль юлдарын норматив хәлгә килтереү, юл хәрәкәте хәүефһеҙлеген арттырыу саралары, шул иҫәптән өҫтәмә фото һәм видеотеркәү камераларын һатып алыу өсөн тотонорға мөмкинлек бирергә тейеш.

http://www.bashinform.ru/news/1227850-dorozhnyy-fond-bashkirii-uvelichat-na-1-6-milliarda-rubley-za-schet-shtrafov-/