Депутаттар Дәүләт Думаһына бензинға хаҡтарҙы дәүләт көйләүе тураһындағы проект индерҙе

ӨФӨ, 2018 йыл, 8 август. /«Башинформ» мәғлүмәт агентлығы, Әлфиә Әғлиуллина/. КПРФ партияһынан депутаттар Дәүләт Думаһына бензинға һәм дизель яғыулығына хаҡтарҙы дәүләт көйләүе тураһында закон проектын индерҙе, тип хәбәр итә «РИА Новости», парламенттың түбәнге палатаһының мәғлүмәттәр базаһына һылтанма менән. Документ 2019 йылдың башынан хөкүмәттең яғыулыҡҡа сикке хаҡ билдәләй алыуын күҙ уңында тота. Билдәләнеүенсә, бындай сара ҡулланыусыларҙы хаҡтарҙың көслө тирбәлеүенән һәм бензинға сығымдарҙың ҡырҡа артыуынан яҡларға мөмкинлек бирергә тейеш.

Бынан алда «Башинформ» агентлығы хәбәр иткәнсә, Өфөләге яғыулыҡ ҡойоу станцияларында бензиндың һәм дизель яғыулығының хаҡы үҙгәрмәй. Статистиктар мәғлүмәттәре буйынса, әлеге ваҡытта баш ҡалабыҙҙа АИ-92 маркалы бензиндың литры уртаса 40, 59 һум; АИ-95 — 43,63 һум, АИ-98 — 47,87 һум. Дизель яғыулығының литры Өфөлә 43,85 һумға төшә. Уҙған йылдың 31 июле менән сағыштырғанда баш ҡалала дизель яғыулығы 14,6 процентҡа ҡиммәтләнде. 92-се бензин ошо ваҡыт эсендә 11,8 процентҡа, 95-се бензин 10,9 процентҡа артты. Ағымдағы йылдың майында Башҡортостанда бензиндың хаҡы алты тапҡыр күтәрелде.

http://www.bashinform.ru/news/1195047-deputaty-vnesli-v-gosdumu-proekt-o-gosregulirovanii-tsen-na-benzin/