Башҡорт ҡарабойҙайы Липецкиҙа Баҫыу көнөнә үҫтерелгән Рәсәй флагының бер өлөшө булды

ӨФӨ, 2018 йыл, 10 июль. /«Башинформ» мәғлүмәт агентлығы/. Башҡорт ҡыҙыл һабаҡлы ҡарабойҙай баҫыуы Бөтә Рәсәй Баҫыу көнөнә (5-7 июлдә үтте) Липецк сорт һынау станцияһы биләмәһендә үҫтерелгән Рәсәй флагының бер өлөшө булды.

Флагтың төҫтәре ҡарабойҙайҙың ҡыҙыл сәскәләре, етендең зәңгәр сәскәләре һәм аҡ сәскәле ҡарабойҙай ярҙамында төшөрөлгән.

Башҡорт ҡыҙыл һабаҡлы ҡарабойҙай төрөн Башҡортостан ауыл хужалығы ғилми-тикшеренеү иститутының авторҙар төркөмө сығарған. Ул 2009 йылда селекция ҡаҙаныштарының Дәүләт реестрына индерелгән. Уның япраҡтарында һәм һабағында ҡиммәтле фармакология препараты рутинды етештереү өсөн перспективалы сеймал материалы булған бик күп флавоноид матдәһе бар. Уның биомассалағы күләме ябай ҡарабойҙайҙағы күрһәткестән 1,5-2 тапҡырға артып китә һәм традицион сеймал сығанағы – япон софораһы орлоҡтары күрһәткесенә яҡыныраҡ. Сорт ҡалдыҡһыҙ ҡарабойҙай үҫтереү технологияһы өсөн ҡулайлаштырылған, тип һөйләнеләр институтта.

Сорттың республикала уртаса уңышы һынау йылдарында гектарынан 15,4 центнер тәшкил итте. Иң юғары уңыш – гектарынан 26,8 центнер – 2011 йылда Дүртөйлө ерендә алынған.

http://www.bashinform.ru/news/1184530-bashkirskaya-grechikha-stala-chastyu-vyrashchennogo-flaga-rossii-na-dne-polya-v-lipetske-/