Төбәктә Миәкә йылғаһы аша күпер төҙөнөләр

ӨФӨ, 2018 йыл, 26 июнь. /«Башинформ» мәғлүмәт агентлығы/. Миәкә районында Һыуыҡкүл-Михайловка ауылында Миәкә йылғаһы аша күпер төҙөнөләр. Ҡоролма Андреевка ауылына илткән юлдың бер өлөшө булып тора. Ошо ауылдарҙа йәшәүселәр тышҡы донъя менән тотороҡло бәйләнешкә эйә булды. Башҡортостандың Транспорт һәм юл хужалығы буйынса дәүләт комитетынан хәбәр итеүҙәренсә, күперҙе «Магистраль» яуаплылығы сикләнгән йәмғиәте төҙөгән, уны ваҡытынан алда тамамлаған.

2018 йылда Башҡортостанда кәмендә 1200 погон метр күпер йүнәтеү күҙаллана, 2017 йылда был һан 864 погон метр тәшкил итте.

Күперҙе асыу тантанаһында Башҡортостандың Транспорт һәм юл хужалығы буйынса дәүләт комитеты рәйесе Тимур Мөхәмәтйәнов булды. Ул район етәкселеге менән юл тармағының хәлен тикшерҙе. Боғҙан ауылында Яҡтыҡаран йылғаһы аша күперҙе, Кожай-Семеновка ауылына юлды, район үҙәге Ҡырғыҙ-Миәкәлә яңы «Көньяҡ» биҫтәһендә урам-юл селтәрен ремонтлау мәсьәләләре, шулай уҡ пассажирҙарҙы ташыу хәле һәм штраф туҡталҡаһын урынлаштырыу өйрәнелде.

http://www.bashinform.ru/news/1178498-v-bashkirii-postroili-most-cherez-reku-miyaki/