«Башҡортостандың иң яҡшы тауарҙары» конкурсына йомғаҡ яһалды

ӨФӨ, 2018 йыл, 9 июнь. /«Башинформ» мәғлүмәт агентлығы/. Республикала «Башҡортостандың иң яҡшы тауарҙары» конкурсына йомғаҡ яһалды. Унда 59 предприятиеның 114 төр продукцияһы һәм хеҙмәттәре күрһәтелгәйне. Еңеүселәр иҫәбендә — бик күп агросәнәғәт комплексы предприятиелары, тип хәбәр иттеләр Башҡортостан Ауыл хужалығы министрлығынан. Мәҫәлән, «Халыҡ өсөн сәнәғәт тауарҙары» номинацияһында — «БашИнком» ғилми-файҙаланыуға индереү предприятиеһының органик ашламалары, «Аҙыҡ-түлек» номинацияһында урындағы икмәк комбинаттары һәм икмәкханалар, ҡошсолоҡ фабрикалары, фермер хужалыҡтары продукцияһы лауреат исеменә лайыҡ булды. Лауреаттар иҫәбендә «Башҡортостан аҙыҡ-түлеге» тауар билдәһенә эйә булған 21 предприятие бар, тип хәбәр иттеләр Башҡортостандың Сауҙа һәм ҡулланыусылар хоҡуғын яҡлау комитетынан.

Конкурс лауреаттары продукцияға «Башҡортостандың иң яҡшы тауары» логотибын ҡуйыу һәм 21 йыл ғәмәлдә булған «Рәсәйҙең иң яҡшы 100 тауары» программаһының федераль этабында ҡатнашыу хоҡуғын алды.

http://www.bashinform.ru/news/1171419-podvedeny-itogi-konkursa-luchshie-tovary-bashkortostana/