Республикала 100 иң яҡшы йортто бүләкләнеләр

ӨФӨ, 2018 йыл, 7 июнь. /«Башинформ» мәғлүмәт агентлығы/. Башҡортостан Торлаҡ-коммуналь хужалыҡ министрлығында 2017 йыл өсөн «Иң яҡшы күп фатирлы йорт» һәм «Торлаҡ-коммуналь хужалыҡ реформаһын мәғлүмәти оҙатыу буйынса иң яҡшы проект ойоштороуға» республика конкурстары еңеүселәрен бүләкләү тантанаһы уҙҙы.

«Иң яҡшы күп фатирлы йорт» конкурсына 16 муниципалитеттан 138 күп фатирлы йорт буйынса материалдар тапшырылған. Иң яҡшы күп фатирлы йорт исеменә дәғүәселәр ишек алдын биҙәү һәм уны таҙа тотоу, конструкция элементтарының, баҫҡыс майҙансыҡтарының, инженер селтәрҙәренең һәм йорттоң алғы яғының техник торошо, дөйөм ҡулланыу урындарын энергияны һаҡсыл ҡулланыу технологиялары ярҙамында яҡтыртыу, инвалид һәм аҙ хәрәкәтле кешеләрҙең хәрәкәте өсөн ҡулайламалар барлығы, балалар һәм спорт майҙансыҡтарын йыһазландырыу, йорт тирәһен биҙәү һәм уны таҙа тотоу критерийҙары буйынса баһаланды.

Конкурс еңеүселәре дипломдар һәм 100 мең һум күләмендә аҡсалата премиялар менән бүләкләнде. Ул йортто һәм дөйөм мөлкәткә ингән ер участкаһын тәртиптә тотоуға тотонола. Шулай уҡ ошо сумманың иң күбендә 10 процентын күп фатирлы йорт рәйесенә йәки торлаҡ милекселәре ширҡәте рәйесенә премия итеп түләүгә йүнәлтергә мөмкин.

«Торлаҡ-коммуналь хужалыҡ реформаһын мәғлүмәти оҙатыу буйынса иң яҡшы проект ойоштороуға» конкурста киң мәғлүмәт саралары журналистары һәм редакциялары тәҡдим иткән 56 материал ҡатнашты. Алты номинацияһының һәр ҡайһыһында еңеүсе республика Хөкүмәте дипломын һәм 50 мең һум күләмендә премия алды.

http://www.bashinform.ru/news/1170375-v-bashkirii-nagradili-100-luchshikh-domov/