Июндә льготалылар, шул иҫәптән һирәк осраған сирҙәр менән яфаланғандар өсөн дарыуҙар һатып алыу күҙаллана – Һаулыҡ һаҡлау министрлығы

ӨФӨ, 2018 йыл, 4 май. /«Башинформ» мәғлүмәт агентлығы, Ольга Мортазина/. Башҡортостан хөкүмәтендә льготалыларҙы, шул иҫәптән инвалидтарҙы һәм һирәк осраған (орфан) ауырыуҙар менән яфаланған граждандарҙы дарыуҙар менән тәьмин итеү мәсьәләһе ҡаралды. Башҡортостан Һаулыҡ һаҡлау министрлығы мәғлүмәттәре буйынса, ошо пациенттарҙы тейешле дарыуҙар менән тәьмин итеү өсөн республикаға йыл һайын 1,2 миллиард һумлыҡ препараттар ҡайтарыла. Республика ҡаҙнаһынан өҫтәмә рәүештә 2018 йылға 1,45 миллиард һум бүленгән. 2014 йыл менән сағыштырғанда орфан сирле пациенттар һаны 28% артҡан.

Проблеманы хәл итеү өсөн республикала юл карталары әҙерләнгән, уларҙа аукциондар урынлаштырыу, контракттар төҙөү һәм медицина тауарҙарын килтереү ваҡыты билдәләнгән. Пландарға ярашлы, дарыуҙар менән тәьмин итеүҙе быйыл июндә ғәмәлгә ашырыу ҡаралған. Әлеге ваҡытта автоматлаштырылған программаны формалаштырыу тамамлана, ул пациентты льготалы препараттар менән тәьмин итеүҙе - уны иҫәпкә ҡуйғандан алып препаратты алғанға тиклем - күҙәтеп барырға мөмкинлек бирә.

Бынан алда киң мәғлүмәт саралары һатып алыуҙарҙы ваҡытында уҙғармау арҡаһында дарыуҙар тәьминәтен тотҡарлауҙары хаҡында хәбәр иткәйне.

http://www.bashinform.ru/news/1153174-zakupki-lekarstv-dlya-lgotnikov-v-tom-chisle-lyudey-s-redkimi-zabolevaniyami-budut-provedeny-v-iyune/