Хеҙмәт министрлығы 1 майҙан республикала минималь эш хаҡының күпме буласағын хәбәр итте

ӨФӨ, 2018 йыл, 27 апрель. /«Башинформ» мәғлүмәт агентлығы, Галина Бахшиева/. 2018 йылдың 1 майынан Башҡортостанда минималь хеҙмәт хаҡы яҡынса 13 мең һум була, тип хәбәр иттеләр республика Хеҙмәт министрлығының матбуғат хеҙмәтенән.

Ведомствола белдереүҙәренсә, 1 майҙан Рәсәйҙә минималь эш хаҡы 11 163 һум тәшкил итә. Урал коэффициентын иҫәпкә алып, Башҡортостанда минималь хеҙмәт хаҡы 12 837,45 һумға етә (айлыҡ норманы тулыһынса тултырған осраҡта). Шулай итеп, 2018 йылдың 1 майынан уҙған йылдың II кварталы өсөн эшкә һәләтле халыҡтың йәшәү минимумы дәүмәле буйынса МРОТ билдәләүҙең яңы механизмы индерелә.

Ғинуар айында Тверь вагондар төҙөү заводында эшселәр менән аралашыу барышында Рәсәй Президенты Владимир Путин минималь хеҙмәт хаҡын һәм йәшәү минимумын тигеҙләү тәҡдиме менән сығыш яһағайны. Яңы закондың положениеларын тормошҡа ашырыу илебеҙҙә йәшәгән 3 миллион кешегә ҡағыла. Шуның 1,6 миллионы дәүләт һәм муниципаль учреждениеларҙа мәшғүл. 1 майҙан минималь хеҙмәт хаҡы арттырылғандан һуң Рәсәй хөкүмәте бюджет хеҙмәткәрҙәренә эш хаҡы түләү өсөн төбәктәргә резерв фондтан 16 миллиард һум аҡса йүнәлтә. Был аҡса ағымдағы йылдың мартында бүленгән 20 миллиард һумға өҫтәлә.

http://www.bashinform.ru/news/1151211-mintrud-bashkirii-nazval-minimalnuyu-zarplatu-v-respublike-s-1-maya/