Башҡортостанда миҙгелле баҫыу эштәренең хаҡы — 15,4 миллиард һум

ӨФӨ, 2018 йыл, 9 апрель. /«Башинформ» мәғлүмәт агентлығы, Ольга Мортазина/. Башҡортостанда аграрийҙарға республика бюджетынан 560 миллион һум өҫтәмә аҡса йүнәлтелә. Был хаҡта Башҡортостан Ауыл хужалығы министрлығынан хәбәр иттеләр.

Һөт малсылығына ярҙам итеүгә 300 миллион һум бүленә. Ведомствола аңлатыуҙарынса, аҡса һатып алыу хаҡтарының түбән булыуына бәйле алып еткерелмәгән килемде компенсациялауға тотонола. Әле эшкәртелмәгән һөттөң 1 килограмы уртаса 19 һум тора — 2017 йылғы кимәлдән бер сиреккә түбән. Хаҡтарҙың төшөүенә илебеҙ баҙарына яҡын һәм алыҫ сит илдәрҙән арзан киптерелгән һөт килтереүҙәре сәбәпсе. 300 миллион һумды май айында март-апрелдә етештерелгән һөт өсөн субсидия рәүешендә түләү ҡаралған. Мартта ғинуар һәм февраль айҙарындағы һөт өсөн 318 миллион һум субсидия түләнгән.

Республика бюджеты шулай уҡ ергә документтарҙы ваҡытында тултырып һәм һалым буйынса бурыстарын ҡаплап өлгөрмәү сәбәпле федераль бюджеттан субсидияһыҙ ҡалған 527 хужалыҡҡа булышлыҡ итеүҙе лә үҙ өҫтөнә ала. Был хужалыҡтарға төбәк яҙғы баҫыу эштәрен ойоштороуға 110 миллион һум йүнәлтә.

Тағы 150 миллион һум процент ставкаһын субсидиялауға йүнәлтелә, был 3,1 миллиард һум кредит йәлеп итеүгә мөмкинлек бирә. Ағымдағы йылда республикаға федераль ҡаҙнанан бүленгән 398,35 миллион һум субсидия 6,5 миллиард һумдан ашыу ҡыҫҡа ваҡытлы кредит алырға мөмкинлек бирҙе. Шуның 5,8 миллиард һумы миҙгелле баҫыу эштәрен үткәреүгә тотонола.

Сәсеү һәм урып йыйыу кампанияларын үткәреүгә, мал аҙығын әҙерләүгә быйыл бөтәһе 15,4 миллиард һум аҡса кәрәк, шуның 8,9 миллиардтан ашыуы — заем аҡсаһы.

http://www.bashinform.ru/news/1141011-stoimost-posevnoy-kampanii-v-bashkirii-15-4-mlrd-rubley/