Башҡортостанда алданған өлөшсөләр өсөн йорттар төҙөүҙе тамамлау графигы раҫланған

ӨФӨ, 2018 йыл, 4 апрель. /«Башинформ» мәғлүмәт агентлығы, Галина Бахшиева/. Башҡортостан Хөкүмәте «алданған өлөшсөләр» реестрына индерелгән граждандарҙың проблемаларын хәл итеү буйынса мөһим төбәк план-графигын, йәки «юл картаһы»н раҫланы.

«Юл картаһы» — республика биләмәһендәге 33 проблемалы объект төҙөлөшөн тамамлауҙың этаплы механизмы ул. 2 апрелдә Башҡортостандың Төҙөлөш һәм архитектура буйынса дәүләт комитеты уларҙы Рәсәйҙең Төҙөлөш һәм торлаҡ-коммуналь хужалыҡ министрлығына ебәрҙе. Апрель урталарында улар министрлыҡтың рәсми сайтында баҫылып сығырға тейеш», — тип хәбәр итте Башҡортостан Төҙөлөш һәм архитектура буйынса дәүләт комитетының матбуғат секретары Елена Вершинина.

«Башинформ» агентлығы хәбәр иткәнсә, әле республикала 5,6 мең алданған өлөшсө бар. Намыҫһыҙ төҙөүселәрҙән зыян күргәндәр реестрында бөтәһе 1140-тан ашыу граждан иҫәпләнә.

«Өлөшләтә ҡатнашыу килешеүҙәре булған объекттар буйынса мәғлүмәт беҙҙә бик актуаль. Ләкин барыһы ла икеләтә, өсләтә һатыуҙар булған «Башстрой», «Стройпроектцентр» кеүек миҫалдарҙы белә, шуға күрә улар буйынса һандың үҙгәреүе мөмкин. Яңы зыян күргән кешеләр асыҡлана, документтарын килтерә, хәҙер беҙ Эске эштәр министрлығы хеҙмәткәрҙәре менән бергә уларҙың дөрөҫлөккә тап килеү-килмәүен тикшерәбеҙ. Шуға күрә намыҫһыҙ төҙөүселәрҙән зыян күргән граждандарҙың һаны даими үҙгәреп тора. Әлегә, беҙҙең мәғлүмәттәр буйынса, төбәктә ошондай 5,6 мең кеше бар», — тип белдергәйне «Башинформ» агентлығында Башҡортостандың Төҙөлөш һәм архитектура буйынса дәүләт комитеты рәйесе урынбаҫары Артем Ковшов.

http://www.bashinform.ru/news/1138980-v-bashkirii-utverzhden-grafik-zaversheniya-stroitelstva-domov-dlya-obmanutykh-dolshchikov/