Инвестиция мөхите торошоноң милли рейтингында Башҡортостан 40-сынан 13-сө урынға күтәрелгән

ӨФӨ, 2018 йыл, 3 апрель. /«Башинформ» мәғлүмәт агентлығы, Ольга Мортазина/. Башҡортостан Рәсәй субъекттарында инвестиция мөхите торошоноң милли рейтингында 2015 йылда 40-сы урындан 2016 йылда – 20-се һәм 2017 йылда 13-сө урынға күтәрелгән. Башҡортостандың Иҡтисади үҫеш министрлығында хәбәр итеүҙәренсә, республикала киләһе һөҙөмтәләр өлгәшелгән. Юридик берәмекте һигеҙ (11 ине) көндә теркәйҙәр, банкта иҫәпте бер көндә (биш ине) асалар, милеккә хоҡуҡтарҙы теркәү – алты көн (ете), кадрҙар иҫәбенә ҡуйыу – дүрт-биш көн (10), ер участкаһының урынлашыу схемаһын раҫлау – 18 көн (алдан бер ай ваҡытты ала ине), күсемһеҙ милек объектына адрес уртаса 11 көндә бирелә (15 ине), электр селтәрҙәренә тоташыу – 42 көн (89 ине), газға – 135 көн.

Инвесторҙар бер нисә кимәлдә дәүләт ярҙамы ала: бизнестың башланғыс этабында субсидиялар (кире ҡайтармай торған), Кесе эшҡыуарлыҡты үҫтереү һәм булышлыҡ итеү фондында һәм банк-партнерҙарҙа кредитлауҙа яуаплылыҡты өҫкә алыу, адрес ярҙамы, Төбөк лизинг компанияһы хеҙмәттәре менән файҙалана.

Былтыр республиканың инвестиция проекттары дөйөм 156,4 миллиард һум инвестициялар күләме менән 22 миллиард һумға һалым ташламаһы алған. Һалым ташламалары менән йылдам үҫеш биләмәләрендә нигеҙләнгән, дәүләт-шәхси партнерлыҡ килешеүе төҙөгән, экологик проекттарҙы тормошҡа ашырыусы инвесторҙар ҡуллана ала.

Дөйөм 2017 йыл йомғаҡтары буйынса республикала Рәсәй төбәктәрендә инвестиция мөхите торошоноң милли рейтингының иң яҡшы тәжрибәләрен индереү буйынса план 99,4 процентҡа үтәлгән.

http://www.bashinform.ru/news/1138392-v-natsionalnom-reytinge-investklimata-bashkiriya-podnyalas-s-40-na-13-mesto/